Нафта ўпершыню з 2009 года стала галоўным экспартным таварам ЗША

Другімі сталі нафтапрадукты.

Са студзеня да верасня гэтага года ЗША прадалі на сусветныя рынкі нафты на $86 млрд. Нафта стала галоўным экспартным таварам краіны ўпершыню з 2009 года, вынікае з матэрыялаў статслужбы ЗША. Другімі сталі нафтапрадукты, іх пастаўкі скарацілася на 19%, да $83 млрд.

Трэцяе месца занялі самалёты, продажы якіх за мяжу павялічыліся на 19%, да $81 млрд. Газ заняў чацвёртае месца, кошт яго паставак упаў амаль на траціну, да $50 млрд. На пятым месцы – аўтамабілі (рост на 11%, да $48 млрд).

У 2009–2021 гадах першыя два радкі экспартнай прадукцыі ЗША дзялілі самалёты і нафтапрадукты. Самалёты былі лідарамі ў 2009 і 2010 гадах, а таксама цягам 2015–2020 гадоў. У 2022 годзе нафта спачатку выцесніла самалёты з другога месца, а сёлета выйшла на першае.

Паводле звестак Мінэнэрга ЗША, у верасні здабыча нафты ў краіне вырасла на 1,7%, або 224 тыс. бараляў за дзень, да 13, 24 млн б/д. Гэта стала абсалютным месячным рэкордам для Штатаў. З пачатку 2022 года аб'ём здабычы нафты ў ЗША вырас на 800 тыс. б/д. Цяпер краіна экспартуе блізу 4 млн бараляў за дзень, а гэта больш, чым усе чальцы АПЕК+, за выключэннем Саудаўскай Аравіі.