Магілёўскім ліфтабудаўнікам ва Украіне выставілі рахунак больш чым на $100 тысяч
10- 11.02.2023, 21:27
- 10,362
Беларускі завод не расплаціўся за прадукцыю.
Украінскае прадпрыемства "Стальканат" звярнулася ў Гаспадарчы суд Адэскай вобласці з пазовам да ААТ "Магілёўскі завод ліфтавага машынабудавання". Пра гэта «МагілёўАнлайн» стала вядома з дакумента суда, апублікаванага на партале Адзінага дзяржаўнага рэестра судовых пастаноў Украіны.
Пазоўнік патрабуе спагнаць з адказчыка запазычанасць 7,8 млн расейскіх рублёў (110,5 тысяч даляраў). Сутнасць пазову не паведамляецца, але можна меркаваць, што "Стальканат", які вырабляе, у тым ліку, і ліфтавыя канаты, паставіў сваю прадукцыю паводле кантракту ААТ "Магілёўліфтмаш", а поўнага разліку не дачакаўся.
Падрыхтоўчае пасяджэнне прайшло 1 лютага, аднак прадстаўнікі скаржніка і адказчыка ў суд не з'явіліся. Суддзя, які разглядае гэтую справу, у іх адсутнасць прыняў пастанову закрыць падрыхтоўчую справу і прызначыў на 6 сакавіка пасяджэнне для разгляду справы паводле сутнасці.
Пазоўніку прапанавана вызначэнне суда перакласці на ангельскую або беларускую мову, натарыяльна засведчыць пераклад і "ўласнымі сіламі" накіраваць дакумент адказчыку, што будзе зрабіць праблематычна. На наступны дзень пасля поўнамаштабнага ўварвання РФ украінская пошта спыніла супрацоўніцтва з "Белпоштай".
Аналагічная сітуацыя склалася і са замежнаэканамічнымі стасункамі дзвюх краін, якія фактычна замарозіліся, у тым ліку і ў банкавай сфэры. Так што нават калі ўкраінскі суд задаволіць пазоў "Стальканата", то на сённяшні дзень вельмі сумнеўна знайсці юрыдычны інструмент для выканання прысуду на тэрыторыі Беларусі.
Дарэчы, Украіна ў аднастароннім парадку скасавала большасць пагадненняў з Беларуссю. У канцы мінулага года ўлады прынялі пастанову з 18 траўня 2024 года спыніць сяброўства Украіны ў Канвенцыі СНД аб прававой дапамозе і прававых стасунках у цывільных, сямейных і крымінальных справах. Пры гэтым было заяўлена, што прававыя стасункі з Расеяй і Беларуссю будуць спыненыя неадкладна.