КДБ забараніў у Беларусі Макса Каржа, J:МОРС, NaviBand ды іншых выканаўцаў
31- 8.02.2023, 20:08
- 24,894

У «чорным спісе» 87 музыкаў.
У інтэрнэце з'явіўся "чорны спіс" выканаўцаў, забароненых у Беларусі. Яго публікуе Беларуская рада культуры.
У спісе 87 пазіцый - як беларускія выканаўцы, так і замежныя. У ліку забароненых называюцца J:МОРС, Дзмітры Калдун, Neuro Dubel, NaviBand, Саша Нема, Іна Афанасьева, Ксенія Сітнік, Ларыса Грыбалёва. З замежных выканаўцаў у спіс патрапілі ДДТ і нават амэрыканская спявачка Шэр.
Паводле звестак Рады культуры спіс, напэўна, складалі супрацоўнікі КДБ. Ён быў перададзены ў дзяржаўныя ўстановы, звязаныя з арганізацыяй канцэртаў.
«КДБ заўсёды меў дачыненне да кантролю над эфірнай палітыкай і гастрольнай дзейнасцю, але адказвала за гэта адміністрацыя Лукашэнкі. Кажуць, цяпер КДБ кіруе ўсёй ідэалогіяй у краіне і больш актыўна ўключыўся ў кантроль, каб не дапусціць вальнадумства», - кажа кіраўнік Рады культуры Сяргей Будкін.
"Чорныя спісы" выканаўцаў існуюць у Беларусі з 1995 года. Афіцыйна яны ніколі не публікаваліся.
