У Беларусі з'явіўся новы тып махлярства

Грошы крадуць пад выглядам аплаты ЖКП.

У Беларусі з'явіўся новы від махлярства. Як паведамляў сайт Charter97.org, двое менчукоў хацелі заплаціць за камунальныя паслугі, але ў выніку з іх картак спісалі больш за 7,5 тысяч рублёў.

Пацярпелых ад такой схемы махлярства ў Беларусі рэгіструецца ўсё больш. Зламыснікі атрымліваюць доступ да рахункаў ахвяр і крадуць іх грошы, пакуль тыя думаюць, што аплачваюць камунальныя паслугі, распавялі ў МУС.

Ашуканцы ствараюць сайт, які візуальна і назвай падобны на банкаўскі, і прасоўваюць яго праз рэкламу ў сацсетках і пошукавых сістэмах, прапаноўваючы аплаціць рахункі за «камуналку». Пераходзячы праз спасылку, карыстальнік пападае на фішынгавую старонку. Калі ён уводзіць там рэквізіты карты, звесткі трапляюць у рукі ашуканцаў, і тыя выкрадаюць грошы з рахунку.

Такія выпадкі фіксуюцца ўжо па ўсёй краіне, адзначылі ў МУС.

Распазнаць падроблены сайт звычайна даволі проста: у яго даменным імені побач з афіцыйнай назвай будуць размешчаны дадатковыя знакі. Акрамя таго, многія раздзелы неактыўныя або пры кліку паведамяць пра памылку.