Польшча пасля прысуду Анджэю Пачобуту закрывае пункт пропуску «Баброўнікі»

Як беларусы рэагуюць на гэтую навіну.

Польскі пункт пропуску «Баброўнікі» прыпыняе сваю працу з 10 лютага.

Пра гэта паведаміў міністр унутраных спраў і адміністрацыі Польшчы Марыюш Каміньскі.

«Праз важныя інтарэсы дзяржаўнай бяспекі я пастанавіў прыпыніць да далейшага апавяшчэння з 10 лютага гэтага года з 12:00 рух на польска-беларускім памежным пераходзе ў Баброўніках», — сказаў ён.

Такім чынам Польшча адрэагавала на прысуд журналісту і аднаму з лідараў Саюза палякаў у Беларусі Анджэю Пачобуту. Лукашысты прысудзілі яму восем гадоў калоніі.

У Гарадзенскай вобласці цяпер не застаецца пагранічных пераходаў з Польшчай. Пункт пропуску «Брузгі - Кузніца» быў закрыты падчас крызісу нелегальных мігрантаў у 2021 годзе.

Цяпер жыхары Гарадзенскай вобласці праз палітыку рэжыму Лукашэнкі павінныя ехаць у Польшчу ці праз Берасцейскую вобласць, ці праз пункты пропускаў на мяжы з Літвой («Беняконі», «Прывалка»).

Беларусы актыўна рэагуюць на навіну аб закрыцці пераходу ў чатах, дзе абмяркоўвалася перасячэнне мяжы:

«Капец, узялі з дзіцем квіткі на 13 чысло. Праз Тырэспаль. Я ўяўляю, што там робіцца».

«Дзякуй, пляшывы, услужыў».

«Астролагі абвясцілі тыдзень(месяц/год) чэргаў на мяжы».

«Яшчэ час ёсць сёння выехаць».

«А як ехаць цяпер? Праз Літву?»

Гэта вялікі ўдар і для грузаперавозак, а таксама малога бізнэсу. Сайт Charter97.org папрасіў жыхара Гародні, які часта ездзіў у Польшчу праз «Баброўнікі», пракаментаваць закрыццё пераходу.

«Закрыццё пункта пропуску - гэта знішчэнне і чаўнакоў, і бізнэсу ІП. У апошнія месяцы чэргі на мяжы і так дасягалі 27 кіламетраў. Праз закрыццё пункта пропуску «Брузгі», нагрузка на «Баброўнікі» была вельмі высокай.

Туды паехалі ўсе: і гарадзенскія, і менскія. Паралельна вырасла нагрузка і на берасцейскім накірунку. Цяпер жа чэргі на «Варшаўскім мосце» павялічацца ў некалькі разоў.

Натуральна, гэта ўдар па возніках. Маршрутчыкам, якія вазілі людзей «на закупы», давядзецца або закрывацца, або вазіць людзей праз Берасце.

Цяжкавікі пацерпяць больш за ўсё. Нягледзячы на тое, што застаецца пункт пропуску «Казловічы», менавіта ў «Баброўніках» была дазволеная перачэпка, у той час як дапушчальныя маршруты ад пункта пропуску «Казловічы» дыктуюць накіроўвацца для выканання грузавых аперацый да складоў часовага захоўвання, дзе магчыма толькі перагрузка, а таксама ў пункты мытнага афармлення, дзе перачэпка выконваецца з абмежаваннямі.

Безумоўна, гэта маштабны ўдар па бізнэсу чаўнакоў. Узаемавыгаднае становішча дапамагала і жыхарам Гародні паехаць на закупы выгаднымі коштамі, і прыносіла прыбытак індывідуальным прадпрымальнікам, якія ўвозілі тавары. Цяпер мала хто захоча стаяць у чарзе і дадаваць да маршруту дадатковыя чатыры гадзіны дарогі да Берасця», - распавёў жыхар Гародні сайту Charter97.org.