Кітай пусціў прамы цягнік з Уханя ў Жодзіна

Чакаецца, што ўвесь шлях зойме 20 дзён.

Кітайскае выданне «Жэньмінь жыбао» паведамляе аб запуску прамога цягніка з Уханя ў Жодзіна. Канчатковы пункт у артыкуле назвалі «Еўропай».

«24 сакавіка з Цэнтральнага вакзала Уханя адправіўся першы цягнік Кітай - Еўропа з паскораным мытным афармленнем, які ідзе па маршруце Ухань (КНР) - Жодзіна (Беларусь). Гэта другі прамы маршрут у Беларусь пасля цягнікоў, якія курсуюць з 2015 года, Кітай - Еўропа з Уханя ў Менск, а таксама яшчэ адзін маршрут цягнікоў Кітай - Еўропа з Уханя.

Цягнік з аўтазапчасткамі і іншымі грузамі пройдзе праз памежны порт Эрэн-Хота і накіруецца ў Жодзіна. Чакаецца, што ўвесь шлях зойме 20 дзён.

Горад Жодзіна знаходзіцца больш чым за 50 кіламетраў ад Менска», — гаворыцца ў паведамленні.

Нагадаем, з Уханя пачалося распаўсюджванне каранавіруснай інфекцыі ў канцы снежня 2019 года.

«Жэньмінь жыбао» - кітайская штодзённая газета, афіцыйнае друкаванае выданне Цэнтральнага камітэта Камуністычнай партыі Кітая. Самая ўплывовая газета краіны.