У баях пад Белгарадам ліквідаваны камандзір палка УС РФ

Таксама паранены камандзір батальёна.

Расейскае войска панесла вялікія страты ў баях за Новую Тавалжанку, што ў Белгародскай вобласці. У баях супраць расейскіх добраахвотнікаў быў ліквідаваны камандзір 1009-га мотастралковага палка УС РФ Уладзімір Кузняцоў пад пазыўным «Улан».

Інфармацыя аб развітанні з высокапастаўленым вайскоўцам з'явілася ў расейскіх пабліках. Гэтыя паведамленні выявіў блогер Necro Mancer.

«Нам паведамілі пра гібель камандзіра мотастралковага 1009-га палка, які ваяваў пад пазыўным «Улан»… Вялікія страты панеслі 8-я і 9-я роты палка. Паводле апошніх звестак, 8-я рота патрапіла ў аблогу…Таксама паранены камандзір 3-га батальёна 1009 палка з пазыўным «Вандроўца», - паведамілі расейцы.

Вядома, што загінулы камандзір палка - гэта палкоўнік УС РФ Уладзімір Кузняцоў з горада Істры, што ў Маскоўскай вобласці. Развітанне з ім адбудзецца заўтра, 8 чэрвеня.

Параненага камбата пакуль апазнаць не ўдалося.

Адзначым, што расейскія апалчэнцы, якія ваююць супраць пуцінскага рэжыму, у апошні час рэгулярна здзяйсняюць рэйды ў Белгародскую вобласць. Яны карыстаюцца тым, што расейскае войска, якое захраснула ў вайне супраць Украіны, практычна не кантралюе ўласныя межы. Цяпер баявыя дзеянні перакінуліся на тэрыторыю Расеі. Масква перакідвае туды войска ў спробе стабілізаваць сітуацыю.