Начальніка з Гомсельмаша судзяць за «дзяржаўную здраду»: у справе з'явіўся «ўкраінскі след»

Што вядома аб гучным працэсе ў Гомелі.

7 ліпеня ў Гомельскім абласным судзе прайшоў разгляд крымінальнай справы аб дзяржаўнай здрадзе. «Флагшток» сабраў усё, што вядома пра гэты працэс.

Суд праходзіць у закрытым рэжыме. Скупыя звесткі з раскладу судоў гавораць аб тым, што абвінавачаным з'яўляецца Уладзіслаў Пудзяк. Мужчына абвінавачваецца паводле частцы 1 артыкула 256 «Здрада дзяржаве». Пад здрадай дзяржаве ў гэтым артыкуле можа разумецца ўладамі перадача замежнікам «дзяржаўных сакрэтаў», не толькі беларускіх, але і іншых дзяржаў. Выкарыстанне часткі 1 гэтага артыкула паказвае на тое, што «дзяржаўныя сакрэты», якія маглі быць перададзеныя іншаземцам, не звязаны з выкананнем абвінавачаным службовых абавязацельстваў.

Пракурор Гомеля Юрый Булыка праліў святло на асобу абвінавачанага. Выступаючы перад работнікамі ААТ «Гомсельмаш», ён расказаў аб тым, што ў дзяржаўнай здрадзе абвінавачваецца былы начальнік аднаго з цэхаў вытворчага аб'яднання. Са звестак Флагштока гаворка ідзе пра экс-начальніка транспартнага цэха дэпартамента забеспячэння вытворчасці ААТ «Гомсельмаш». З 2014 да 2019 год Уладзіслаў Пудзяк тройчы ўваходзіў у склад участковых выбарчых камісій у Гомелі.

Праверыць інфармацыю дапамаглі Кіберпартызаны. З іх звестак у пашпартнай базе Беларусі няма іншых грамадзян з такімі ж прозвішчам, імем і імем па бацьку.

Аналіз сацыяльных сетак Уладзіслава Пудзяка паказвае на магчымы «ўкраінскі след» у гэтай крымінальнай справе. У мужчыны ёсць жонка, якая родам з украінскага пасёлка Дабранка. Населены пункт размешчаны на самай мяжы з Беларуссю, усяго за 50 кіламетраў ад Гомеля.

У Беларусі гэта ўжо не першы крымінальны працэс, звязаны з наяўнасцю роднасных сувязей у Чарнігаўскай вобласці. У студзені 2023 года ў Віцебску быў затрыманы ураджэнец Чарнігава Андрэй Шмай. Мужчына жыў у Беларусі ўжо 10 гадоў, працаваў рабочым у комплексным абслугоўванні і рамонце будынкаў у Віцебскім аблвыканкаме. Падставай для абвінавачання ў «агентурнай дзейнасці» паслужыла выкарыстанне дадатку Signal для сувязі са сваякамі ў Чарнігаўскай вобласці.