Ангола выганяе Расею з найбуйнейшага алмазнага бізнэсу ў свеце

Стала вядомая прычына.

Ангола змушае расійскую транснацыянальную кампанію «Алроса» выйсці з супольнага бізнэсу «Sociedade de Catoca», якому належыць чацвёртая найбуйнейшая алмазная шахта свету.

Гэта звязана з санкцыямі, уведзенымі супраць Расеі ў сувязі з уварваннем ва Украіну. Яны шкодзяць гандлю ангольскімі дыяментамі, паведамляе ангольскае выданне EXPANSÃO.

Як адзначаецца, на мінулым тыдні прадстаўнікі ангольскай улады сустракаліся з расейскімі калегамі ў Дубаі (ААЭ), для таго, каб развязаць пытанне выхаду расейскага акцыянера «Алроса» з «Sociedade Mineira de Catoca».

Сітуацыя негатыўна адбіваецца на Catoca, чацвёртай па велічыні алмазнай шахце ў свеце.

Здабыча дыяментаў на рудніку скарацілася, і шматлікія пастаўшчыкі і банкі адмаўляюцца працаваць з Catoca праз сувязі з расейцамі.

Расейскай кампаніі належыць 41% кампаніі.

Ангольскі бок патрабуе, каб расейцы сышлі з бізнэсу без умоў, затое расейцы жадаюць кампенсацый за інвестыцыі.

Адзін з магчымых шляхоў развязання праблемы - гэта тое, што «Алроса» цяпер сыдзе, але з гарантыяй, што яна зможа вярнуцца ў будучыні, калі санкцыі будуць знятыя.

Аднак, улічваючы нядаўняе збліжэнне Анголы з ЗША, расейцы з падазрэннем ставяцца да такога выніку.

Іншы варыянт - гэта тое, што расейцы прададуць сваю долю акцый ангольскай кампаніі. Аднак пакуль незразумела, ці будуць яны гатовыя гэта зрабіць. На гэты момант сітуацыя застаецца нявызначанай.

Выхад расейцаў з супольнага прадпрыемства па здабычы дыяментаў неабходны для таго, каб зняць санкцыі з шахты, але гэта можа быць складанай задачай.