Зяленскі патэлефанаваў прэзідэнту Польшчы Дуду

Абмеркавалі мяжу, падтрымку Украіны і ўдзел у ЕЗ.

Прэзідэнт Украіны Уладзімір Зяленскі падзякаваў прэзідэнту Польшчы Анджэю Дуду за падтрымку Украіны на шляху да ўступлення ў ЕЗ і NATO і падкрэсліў, што паміж польскім і ўкраінскім народамі «не павінна быць межаў». Пра гэта ён сказаў у аўторак, 9 студзеня, падчас тэлефоннай размовы з польскім прэзідэнтам.

«Наша агульная мяжа мусіць быць сапраўднай еўрапейскай мяжой. Мяжой адзінства», – сказаў Зяленскі.

Прэзідэнты абмеркавалі пытанні фінансавання Украіны з боку ЕЗ і палітычную падтрымку, а таксама магчымыя пастановы будучага саміту NATO.

Зяленскі падзякаваў Польшчы за пастанову даслаць прадстаўніка на сустрэчу ў Давосе датычна формулы міру і ўзняў пытанне пра далучэнне Польшчы да супольнай дэкларацыі Групы сямі датычна гарантыяў бяспекі для Украіны.

Таксама бакі абмеркавалі расейскія масаваныя атакі і неабходнасць узмацнення ўкраінскай СПА.