На таргах паспрабавалі прадаць кватэру сям'і Цапкалы

Чым скончыўся аўкцыён.

На 27 лютага быў прызначаны аўкцыён аб продажы трохпакаёвай кватэры ў Менску, якая належыць сям'і Валерыя Цапкалы — экс-прэтэндэнта ў кандыдаты ў прэзідэнты Беларусі ў 2020 годзе. Аднак таргі не адбудуцца - няма ўдзельнікаў.

На таргі ў набыцці трохпакаёвай кватэры ў Менску можна было зарэгістравацца да 16.00 26 лютага. Сам аўкцыён мусіў адбыцца сёння, 27 лютага. Аднак на сайце электроннага аўкцыёну з'явілася аб'ява аб тым, што кватэру прадаваць не будуць. Прычына - адсутнасць удзельнікаў, якія хочуць набыць нерухомасць.

Нагадаем, 12 лютага "БелЮрЗабеспячэнне" выставіла на таргі трохпакаёвую кватэру, размешчаную ў доме № 5 на вуліцы Чарнышэўскага. Агульная плошча жылля - 103,7м =². Разам з жытлом хацелі прадаць месца ў падземным гаражы. У кватэры зарэгістраваны адзін чалавек. Паведамляецца, што завінавачаны - Валерый Цапкала. Пачатковы кошт маёмасці – 358 442 рубля 20 капеек.

Жонка Валерыя Цапкалы, Вераніка, адзначала раней, што нерухомасць належыць не толькі яе мужу, але таксама ёй і непаўналетнім дзецям. На ейную думку, пастановай выставіць на таргі нерухомасць парушаецца ў тым ліку Канстытуцыя. Жанчына заклікала Следчы камітэт і пракуратуру правесці расследаванне аб продажы нерухомасці.

Валерый Цапкала раней кіраваў беларускім Паркам высокіх тэхналогій. Для ўдзелу ў прэзідэнцкай кампаніі 2020 года ён сабраў ініцыятыўную групу, ездзіў па краіне. Аднак ЦВК адмовіла яму ў рэгістрацыі.

Валерый Цапкала пакінуў краіну ў ліпені 2020 года, баючыся пераследу. 9 жніўня з Беларусі з'ехала і Вераніка.

На радзіме Валерыя Цапкалу завочна прысудзілі да 17 гадоў калоніі ўзмоцненага рэжыму.