Стала вядома пра стан беларускі, якую спрабавалі задушыць у цэнтры Варшавы
- 29.02.2024, 9:55
- 13,988
![Стала вядома пра стан беларускі, якую спрабавалі задушыць у цэнтры Варшавы](https://i.c97.org/ai/585591/aux-head-1709189728-20240225_belaruska_360.png)
Яе хлопец шукае лекараў з Беларусі з досведам у неўралогіі.
Беларусцы, на якую напалі ў Варшаве, не становіцца лепш. 25-гадовая Лізавета не прыходзіць у прытомнасць і падключаная да ШВЛ. Да вечара 28 лютага стан беларускі, на які напалі і згвалтавалі ў цэнтры Варшавы 25 лютага, не палепшыўся. Дзяўчына па-ранейшаму знаходзіцца ў рэанімацыі і не прыходзіць у прытомнасць.
«Яна ўсё гэтак жа без прытомнасці і ёсць сур'ёзныя праблемы з кровазабеспячэннем», - распавёў «Белсату» хлопец Лізаветы Даніла.
Лекары прагназуюць вегетатыўны стан або смерць, аднак Даніла спадзяецца на лепшае.
25-гадовая Лізавета не працавала афіцыйна і зараз у яе няма медыцынскай страхоўкі, таму Данііл адкрыў збор сродкаў на яе лячэнне і рэабілітацыю. Да сямі вечара 28 лютага сабрана больш за $90 тысяч.
«Ведаю, што клініка можа запатрабаваць аплату… магчыма ў кагосьці ёсць досвед ці разуменне прававых аспектаў такога становішча. На жаль, лекары даюць несуцяшальны прагноз… і, магчыма, запатрабуецца вельмі доўгая рэабілітацыя… зыходзячы з гэтага, прашу фінансавай падтрымкі, каб была магчымасць аператыўна выконваць усё-ўсё, што запатрабуецца, для выратавання маёй каханай!» – кажа Даніла.
Ён таксама шукае лекараў з Беларусі з досведам у неўралогіі, каб разабрацца, што адбываецца з Лізаветай, і што ёй неабходна.
Лізавета нарадзілася ў аграгарадку Путчына Дзяржынскага раёна Менскай вобласці. Яна з'ехала з Беларусі ў 2020 годзе пасля пачатку рэпрэсій. У Варшаве жыла без сваякоў і найбліжэйшы чалавек для яе там - гэта Даніла.
Напад на Лізавету адбыўся 24 лютага, калі яна вярталася ноччу дадому пешшу. 23-гадовы мужчына напаў на яе з нажом, прыціснуў да брамы, душыў і згвалтаваў, паведамляе fakt.pl. Пасля гэтага ён пакінуў яе на лесвіцы перад будынкам і паехаў на трамваі ў сваю кватэру.
Лізавета ў непрытомным стане доўгі час ляжала на лесвіцы. Яе знайшоў ахоўнік, які прыйшоў на працу ў ранішнюю змену. Ратавальнікі, якія прыбылі на месца здарэння, рэанімавалі яе на працягу некалькіх хвілін. Дзяўчына знаходзіцца ў шпіталі ў вельмі цяжкім стане.
«З таго, што мне казалі, выходзіць, што па фактычна яна памерла, і нейкі час сэрца не працавала. Потым лекары яе рэанімавалі. Цяпер з-за гэтага праблемы з мозгам, ён нейкі час не атрымліваў кісларод», - распавёў Даніла.
Гвалтаўніка затрымалі ў дзень злачынства. Яму выставілі абвінавачанні ў сэксуальным злачынстве, рабаванні і замаху на забойства з прымяненнем небяспечнай зброі. У здымнай кватэры, дзе ён жыў, знайшлі балаклаву, кухонны нож, два мабільныя тэлефоны. А таксама плацежныя карты і партманэт пацярпелай, паведамляе варшаўская паліцыя.
Яму пагражае да 25 гадоў пазбаўлення волі ці пажыццёвае зняволенне.