Лукашэнка прыгадаў лозунг «Стоп таракан!»

Дыктатар дагэтуль трымае крыўду на папулярны лозунг.

Следчы камітэт пачаў працэс спецыяльнай справы ў дачыненні да жыхаркі Глыбокага Людмілы Барэйкі, паведамляе прэс-служба ведамства.

Жанчыну абвінавачваюць паводле артыкула 188 КК (Распаўсюджванне загадзя ілжывых звестак, якія ганьбяць іншую асобу (паклёп) у інфармацыі, размешчанай у глабальнай кампутарнай сетцы Інтэрнэт, якія змяшчаюць абвінавачванне ва ўчыненні цяжкага злачынства). Ёй прапануюць прыйсці ў Следчы камітэт на адрас: горад Глыбокае, вуліца Леніна, 95. Цяпер Барэйка знаходзіцца за мяжой.

Як піша праваабарончы цэнтр «Вясна», менавіта яна прыдумала лозунг «Стоп таракан!».

Людміла Барэйка стала вядомай у Беларусі пасля стрыму Сяргея Ціханоўскага, які 31 сакавіка 2020 года прыязджаў у Глыбокае. На сустрэчы жанчына расказала, як жывуць людзі ў яе родным горадзе, выказала сваё меркаванне аб палітыцы Аляксандра Лукашэнкі, а таксама аб эпідэміі каранавіруса.

Пасля гэтай сустрэчы жанчына атрымала штраф 270 рублёў за парушэнне ч.1 арт.23.34 КоАП. З пункту гледжання міліцыі, яна ажыццявіла «пікетаванне шляхам публічнага выказвання сваіх грамадска-палітычных інтарэсаў і ўласнага стаўлення да дзейнай улады ў рэжыме онлайн на YouTube-канале «Краіна для жыцця» без адпаведнага дазволу Глыбоцкага раённага выканаўчага камітэта» (з запісу ў пратаколе).