Расейскаму актору Міхаілу Яфрэмаву ўхвалілі ўмоўна-датэрміновае вызваленне

Ён можа датэрмінова выйсці з калоніі ў Белгарадзе, дзе адбывае пакаранне за ДТЗ са смяротным зыходам.

Вядомы расейскі актор Міхаіл Яфрэмаў, які адбывае тэрмін зняволення ў калоніі за дарожна-транспартнае здарэнне, якое прывяло да смерці, можа быць вызвалены ўмоўна-датэрмінова. Пра гэта паведаміў агенцтву ТАСС старшыня Грамадскай наглядальнай камісіі Масквы Георгій Волкаў.

Паводле словаў Волкава, хадайніцтва Яфрэмава аб умоўна-датэрміновым вызваленні было ўхваленае адміністрацыяй калоніі ў Белгарадскай вобласці, дзе ён адбывае пакаранне. Канчатковую пастанову аб датэрміновым вызваленні актора павінен будзе вынесці суд, дата якога пакуль невядомая.

Нагадаем, што 8 чэрвеня 2020 года Міхаіл Яфрэмаў патрапіў у аварыю ў Маскве. Ягоны аўтамабіль урэзаўся ў фургон, кіроўца якога памёр у лякарні ад атрыманых траўмаў. Як паказала экспертыза, актор сеў за руль п'яным.

У верасні 2020 года суд асудзіў Яфрэмава да васьмі гадоў калоніі. Пазней гэты тэрмін быў скарочаны да сямі з паловай гадоў, бо актор кампенсаваў маральную шкоду сваякам загінулага. Гэтая справа, беручы да ўвагі вядомасць Міхаіла Яфрэмава, выклікала вялікі грамадскі рэзананс.