У Расеі прагрымеў выбух і ўспыхнуў пажар на буйной ЦЭЦ

Шмат пацярпелых.

У Расеі на Шанагарскай ЦЭЦ у Рэспубліцы Тува 6 сакавіка прагрымеў выбух. Пасля яго на аб'екце ўспыхнуў магутны пажар.

Пра гэта паведамляюць украінскія СМІ.

З іх звестак, з прычыны інцыдэнту пацярпелі шмат людзей: на 6 гадзін раніцы па менскім часе агучваліся лічбы ад 10 да звыш 20 чалавек.

Факт выбуху і пажару, які рушыў за ім, пацвердзіў губернатар Тывы Уладзіслаў Хавалыг.

“Высвятляем прычыны надзвычайнага здарэння на Шаганарскай ЦЭЦ. Загінулых няма, але вядома аб 10 пацярпелых. Яны шпіталізаваныя. На месцы працуюць аператыўныя службы, будынак ачэплены. Выязджаю ў Шаганар. Ствараем аператыўны штаб, куды ўвойдуць кіраўніцтва МНС, МУС, Расгвардыі, рэгіянальных Міністэрства аховы здароўя, МінЖКГ, Мінпалэнерга, Службы ГА і НС. Мабілізуем аварыйныя брыгады для ліквідацыі наступстваў”, - напісаў ён а 05:19 па менскім часе.

Дзе менавіта ўзнік пажар, расейскія СМІ блытаюцца. Пакуль адны пішуць, што агонь "меркавана ўспыхнуў у кацельні", іншыя сцвярджаюць, што эпіцэнтрам узгарання стала цэнтральнае памяшканне кампаніі "КК ПЭК 4", якое змяшчае аб'ект.

Невядома таксама, што стала прычынай пажару.

Афіцыйныя паведамленні аб інцыдэнце вычэрпваліся фармулёўкай "адбыўся пажар і задымленне" (так ахарактарызавалі тое, што адбылося ў МНС рэгіёну).

На 6 гадзін раніцы расейскія СМІ заяўлялі аб павелічэнні колькасці пацярпелых. Пры гэтым звесткі адрозніваюцца.

Так, адзін з расейскіх СМІ сцвярджаў, што пацярпелі 16 чалавек, а пад руінамі будынка, у якім прагучаў выбух, могуць заставацца людзі.

Іншае выданне пісала, што "колькасць пацярпелых павялічылася да 18, шэсць з іх знаходзяцца ў рэанімацыі ў цяжкім стане".

Трэцяе ж СМІ сцвярджала, што розныя траўмы атрымалі больш за 20 чалавек. Большасць пацярпелі ад угарнага газу або атрымалі апёкі. Шпіталізаваны 17 пацярпелых. Гэты рэсурс таксама пісаў аб тым, што пад руінамі могуць знаходзіцца людзі.

На 7 гадзін раніцы па менскім часе Хавалыг пацвердзіў пра 18 пацярпелых.

“Пажар на Шаганарскай ЦЭЦ лакалізаваны. На гэты момант 18 чалавек шпіталізаваныя. Шэсць знаходзяцца ў цяжкім стане. 9 - у стане сярэдняй цяжкасці. Яшчэ ў траіх стан бліжэйшы да прымальнага. Усіх пацярпелых зараз транспартуюць у рэспубліканскія бальніцы ў Кызыл. На змену ў ЦЭЦ заступіў 21 чалавек. Вядуцца пошукі астатніх траіх”, - напісаў губернатар.

Мясцовае Міністэрства аховы здароўя аб'явіла, што на месца падзей адправілі брыгаду лекараў, у якую ўваходзяць анестэзіёлагі і рэаніматолагі.