«У твар не гавораць, але за спінай людзі шэпчуцца»

Беларусы расказалі, чаму далі дзецям касмічныя імёны.

Беларусы прадаўжаюць эксперыментаваць з імёнамі для дзяцей. Нядаўна ў жыхароў Гомеля Ганны і Вадзіма нарадзіўся сын, якога назвалі Космас. Як высветлілася, яны не адны. Пасля публікацыі нататкі з «Анлайнерам» звязаліся адразу некалькі бацькоў, якія абралі для сваіх малых касмічнае імя. Журналісты даведаліся, чым яно так прывабіла, як да падобнага жадання паставіліся ў ЗАГСе і якой была рэакцыя блізкіх.

«Калісьці думала: “Што за дурное імя?!” А потым сама так назвала сына»

Паўтара года таму ў жыхароў Берасця Лізы і Аляксандра нарадзіўся сын. Варыянтаў, як назваць дзіця, было некалькі, але ў выніку выбар упаў на імя Космас.

– Гэтая ідэя належыць майму мужу, – успамінае маладая мама. – Першапачаткова ён прапанаваў назваць сына Кузьма, але мне не падабалася, і тады прапанаваў Космас. Рэч у тым, што ў майго мужа ёсць два дарослыя сыны ад першага шлюбу, і ён ужо хацеў так назваць другога. Але тады ніхто не дазволіў.

У сваю чаргу я паглядзела значэнне імя. Высветлілася, што яно сімвалізуе мір і спакой. Мне вельмі хацелася гэтага стану ў жыцці, і я пагадзілася.

Што цікава, пра гэтае імя я ўжо чула раней: глядзела калісьці эфір блогеркі, якая менавіта так назвала сваё дзіця. Тады я падумала: «Што за дурное імя?! Ніколі б так свайго сына не назвала». Але я тады яшчэ была амаль дзіцем і многае прымала ў штыкі. Падзеі ў жыцці разгарнуліся так, што я зразумела: не варта нічога ўспрымаць варожа.

Муж Лізы расказаў нам, што астранамічнага падтэксту ў гэтым імені для яго няма. Яно першапачаткова асацыявалася з героем папулярнага ў нулявых серыяла «Брыгада», у якім яму асабліва імпанаваў персанаж Космас Халмагораў.

Блізкія адрэагавалі на імя па-рознаму. Бацькі дзяўчыны ўспрынялі спакойна, і, як дадае Ліза, яе маці ўжо не ўяўляе, што ўнука маглі назваць інакш. А вось бацька Аляксандра доўгі час імя ігнараваў і называў унука проста – хлопчык. Але і дзядуля з часам прыняў незвычайнае імя.

– З агрэсіяй праз імя мы не сутыкаліся. У асноўным людзі ўспрымаюць імя Космас са здзіўленнем. Ёсць толькі адна жанчына (з ёй мы ў выдатных стасунках), якая наўпрост кажа: «Ну, не магу я яго так зваць». Але, паўтаруся, гэта толькі адзінкавы выпадак.

У ЗАГСе, дарэчы, адрэагавалі вельмі спакойна. Мяне папрасілі напісаць імя на паперцы, потым спыталі, ці сапраўды мы хочам назваць так дзіця, і ўсё. Праблемаў не было. Але на ўсялякі выпадак мы падрыхтаваліся і гатовыя былі паказаць інфармацыю, што такое імя рэальна існуе, – усміхаецца дзяўчына.

«Імя дапамагала пры знаёмстве з дзяўчынкамі»

Нашаму чарговаму герою ўжо за 30. Яго таксама клічуць Космас, ён жыве пад Менскам і для пацверджання асобы нават даслаў фота дакумента.

– Назваць мяне так пастанавіў бацька, – кажа суразмоўца. – А чаму так, на жаль, спытаць ужо не магу – ён даўно памёр. Я са сваім імем звыкся і ў жыцці хаджу з пашпартам. Часам людзі пытаюцца: «Гэта прозвішча такое? Мянушка?» Кажу: «Не, імя». І калі нехта здзіўляецца, адразу паказваю пашпарт, каб больш не было пытанняў.

Мужчына расказвае, што з незвычайным імем яму заўсёды жылося нармальна. Сябры скарочана называлі яго «Кос», настаўнікі рэагавалі адэкватна. Толькі пажылыя бабулі, з якімі Космасу Дзмітрыевічу даводзіцца сутыкацца на працы, могуць сабе дазволіць нешта накшталт: «Гэта ж трэба было так чалавека назваць!» – але не больш за тое.

– Нейкіх дзіўных сітуацый, звязаных з маім імем, у мяне не здараліся. Хоць у юнацтве дзяўчаткі часта дзівіліся, і гэта нават дапамагала мне ў знаёмствах, – успамінае Космас. – Ім адназначна падабалася.

Суразмоўца ніколі не адчуваў дыскамфорту са сваім імем і не хацеў яго памяняць. «Я ўспрымаю яго больш чым адэкватна», – прызнаецца хлопец. Да арыгінальных імёнаў ён ставіцца дадатна. І, даведаўшыся, што ў яго з жонкай народзіцца сын, таксама надумаў даць яму рэдкае імя – хлопчыка назвалі Усевалад.

«Называем сына Касмалётам»

Наталля і Аляксандр жывуць у Кобрыне і выхоўваюць траіх дзяцей. Усіх сужэнцы назвалі касмічна: Венера, Космас і Усяленна. Наталля расказала, што ў ЗАГСе на іх ідэі рэагавалі скептычна, але бацькі здолелі даказаць, што ўсе імёны існуюць.

– Імёны дзецям прыдумаў мой муж. Першай, у 2017 годзе, у нас нарадзілася дачка, і мы назвалі яе Венерай. Чаму выбралі такое імя? Саша неяк глядзеў на неба і ў нейкі момант падумаў: а чаму б дачку не назваць Венерай. Я адрэагавала зусім спакойна і ў гэтым жаданні яго падтрымала. Тым больш касмічная тэматыка мяне саму вельмі цікавіць. Так, некаторыя блізкія спачатку не разумелі, але потым усё наладзілася, – тлумачыць Наталля. – Ну, а пазней мы пастанавілі, што ўсіх нашых дзяцей будзем называць незвычайна і ад касмічнай тэмы больш не адыходзілі. Потым, у 2022-м, у нас нарадзіліся Космас (гэтае імя абмеркавалі загадзя) і Усяленна.

– А імя Усяленна існуе? – Удакладняю ў Наталлі.

– Нам у ЗАГСе адмаўлялі нават з Венерай, але мы ўсё роўна пацвердзілі, што такое імя ёсць, і дамагліся свайго. Што да Усяленны, яны таксама ў ім не былі ўпэўненыя, але ў выніку ўсё скончылася нармальна. Гэтае імя, як і Космас, рэальна існуе. Проста яно вельмі старое.

Як называем дзяцей? Усяленну – Усяленчык, Космаса – Касмалёт або Касманаўт.

Сваякі імёны дзяцей прынялі. А вось іншыя людзі да такога выбару часам ставяцца неадназначна, зазначае Наталля. На гэты конт у яе сваё меркаванне.

– У твар не гавораць, але за спінай людзі шэпчуцца. Акрамя таго, я нядаўна пачала весці TikTok, і вось у каментарах часам лаюцца, пішуць, што назвалі дзяцей агідна, жудасна і паламалі ім жыццё. Нехта кажа, што праз імёны іх будуць крыўдзіць у школе. Але я заўсёды кажу: «На такія выпадкі ў іх ёсць маці. І калі хтосьці кране маё дзіця праз імя, я за яго заступлюся і ніколі не дазволю яго пакрыўдзіць». Асабіста ж я мяркую, што гэтыя імёны прынясуць ім толькі карысць.

Пра чацвёртае дзіця Наталля з мужам пакуль не задумваюцца, але Наталля прызналася: у запасе яшчэ ёсць некалькі імёнаў, якія ёй вельмі падабаюцца – Галакціёна, Звязда і Марс.