Палёт Васілеўскай як сцёб
20- Марк Дзюба
- 14.04.2024, 21:29
- 18,266
![Палёт Васілеўскай як сцёб](https://i.c97.org/ai/591504/aux-head-1713119342-20240101_vasilev_luka_360.jpg)
Лукашэнка ўсё менш разумее, што хвалюе сучасных людзей.
Пасля вяртання Марыны Васілеўскай на Зямлю, дзяржаўная прапаганда стала казаць аб палёце ў космас «першай касманаўткі ў гісторыі суверэннай Беларусі». Але сцвярджэнне аб тым, што бортправадніца «Белавія» з'яўляецца касманаўтам, зʼяўляецца моцным перабольшаннем.
У той жа Расеі, каб атрымаць званне «касманаўт-даследчык», трэба адвучыцца некалькі гадоў і здаць дзяржаўны іспыт. Плюс, каб накіравацца ў космас, трэба яшчэ некалькі гадоў рыхтавацца да палёту. Бортправадніцу ж рыхтавалі прыхапкам, з задачай, каб яна на МКС нічога не нарабіла.
Касманаўт Алег Навіцкі, які сачыў за Васілеўскай, казаў пра гэта амаль прамым тэкстам. На сустрэчы з Лукашэнкам ён сказаў: «Можа, яшчэ закінуць пытанне, каб была магчымасць беларусам не як замежнікам, а як братам мець магчымасць удзельнічаць у падрыхтоўцы як прафесіяналам. А не проста як турыстам на кароткі палёт».
![](https://i.c97.org/ai/591504/aux-1713119356-11.jpg)
А на сустрэчы з удзелам Пуціна ён адзначыў: «(Марына) не была клопатам на станцыі ні ў якім разе, як магло б чакацца ад кароткага палёту».
Аб тым, чым займалася Марына Васілеўская на МКС, няма ніякай канкрэтыкі. Ды і сам яе палёт доўжыўся не паўгода, а 14 дзён.
І, як бы Расея не дапамагала з падрыхтоўкай Васілеўскай, касманаўтам яе там не лічаць. Пасля сустрэчы ў Крамлі прэс-служба Пуціна назвала Навіцкага лётчыкам-касманаўтам, Васілеўскую – бортправадніком-інструктарам авіякампаніі «Белавія».
А ва ўказе кіраўніка РФ аб прысваенні дзяржузнагарод яна названа «беларускай удзельніцай касмічнага палёту».
Дзяржаўная прапаганда практычна ператварыла палёт Васілеўскай у сцёб
Перагнулі палку не толькі ў пафасных паведамленнях у дзяржаўных СМІ. На менскіх вуліцах дадумаліся вывесіць білборды са сцвярджэннем «космас – наш!».
![](https://i.c97.org/ai/591504/aux-1713119356-22.jpg)
Калі б не веданне, што гэта адбывалася насамрэч, можна было б падумаць, што гаворка пра фотажабы, якія высмейваюць заявы прадстаўнікоў рэжыму.
У Беларусі няма касмічнай інфраструктуры, адзіную яе «касманаўтку» ў суверэннай гісторыі рыхтавалі расейскія спецыялісты – пра якое «заваяванне космасу» можа ісці гаворка?
Для даведкі, Марына Васілеўская стала прадстаўніцай прыкладна 48-й краіны, чые грамадзяне пабывалі ў космасе. Амаль адразу ўслед за прадстаўнікамі такой дзяржавы як Антыгуа і Барбуда (ёсць такая ў Карыбскім моры).
Незразумела, што ад усяго гэтага выйграў Лукашэнка
Палёт беларусаў у космас (Пётр Клімук, Уладзімір Кавалёнак, Валянціна Церашкова, якая вырасла ў беларускай сямʼі) станавіўся падзеяй у мінулым стагоддзі, падчас асваення сусвету СССР.
Палёт Васілеўскай у фармаце касмічнага турызму ў XXI стагоддзі падзеяй не мог стаць і не стаў – нягледзячы на ўсе намаганні прапаганды. Напрыклад, яго не абмяркоўвалі шырока ў сацсетках. А па прыбыцці Васілеўскай у Менск, яе сустрэлі не радасныя натоўпы, а толькі невялікая група чыноўнікаў і прадстаўнікоў БРСМ.
Лукашэнка хацеў выкарыстаць палёт грамадзянкі Беларусі ў прапагандысцкіх мэтах як нейкае дасягненне выбудаванай ім сістэмы, але 69-гадовы палітык усё менш разумее, што хвалюе сучасных людзей.
Больш за тое, спрабуючы паставіць сабе ў заслугу палёт Васілеўскай у космас, ён прынізіў удзел у праекце беларускага боку: «Пуцін малайчына, дапамог. Яны прафінансавалі падрыхтоўку і запуск. Гэта, я вам скажу, нятаннае мерапрыемства. Абыйшлося б у $70 млн, гэты палёт. Яны малайцы, уключылі ў склад сваіх, падрыхтавалі нашых дзяўчынак».
Перакладаючы на простую мову, Васілеўская злятала ў космас «на халяву».
А вось што выйграў ад такога «падарунку» Пуцін, цалкам можна здагадацца. Лукашэнка зноў паказальна прадставіў Беларусь у якасці «малодшага брата», які павінен быць удзячны «старэйшаму» за падтрымку.
І, у выпадку чаго, Пуцін аб аказанай паслузе Лукашэнка абавязкова нагадае.
Марк Дзюба, «Салiдарнасць»