Столтэнбэрг: У NATO ёсць шмат сістэм СПА, якімі можна падзяліцца з Украінай

Раней Нямеччына запусціла ініцыятыву па пошуку сістэм СПА для Кіева.

У хаўруснікаў па NATO ёсць дастатковая колькасць сістэм супрацьпаветранай абароны, якія можна даць Украіне для абароны ад расейскіх нападаў.

Пра гэта заявіў генеральны сакратар NATO Енс Столтэнбэрг падчас прэс-канферэнцыі ў сераду, 17 красавіка.

Ён адзначыў, што не можа ўказаць дакладную колькасць, бо гэта «выведвальная або сакрэтная інфармацыя». Пры гэтым ён дадаў, што ў Еўропе іх менш за 100 адзінак.

Столтэнбэрг таксама дадаў, што ў NATO ёсць значная колькасць батарэй Patriot, але гэта таксама адлюстроўвае той факт, што ЗША, якія з'яўляюцца хаўруснікам з найбольшай колькасцю гэтых сістэм СПА - «нясуць глабальную адказнасць».

«Але рэальнасць такая, што, вядома, у нас ёсць сістэмы, дастаткова вялікія для таго, каб мы маглі пастаўляць значна больш Украіне, калі гаворка ідзе аб супрацьпаветранай абароне агулам, напрыклад, батарэі Patriot. І менавіта над гэтым мы цяпер працуем», - дадаў генеральны сакратар NATO.

Як паведамляў Charter97.org, раней Нямеччына запусціла ініцыятыву па пошуку сістэм СПА для Украіны.