Лукашэнка ўспаў на беларусаў, якія прыязджаюць падлячыцца на радзіму з-за мяжы

Дыктатар прыстрашыў ускладніць ім жыццё.

Ужыць захады супраць беларусаў, якія з'ехалі за мяжу, якія прыязджаюць на радзіму лячыцца, паабяцаў Аляксандр Лукашэнка 2 красавіка падчас наведвання Гародні.

Узурпатар чарговым разам заявіў, што нікога ў Беларусі не трымае.

- Калі камусьці дрэнна тут, складана - мы нікога не трымаем. Шкада, вядома, што некаторыя з'язджаюць, але мы нікога не трымаем. Я памятаю, з былым мэрам Гародні ехалі ў аўтамабілі пару гадоў таму. Я яму кажу: «Ну вось, людзі ад цябе з'язджаюць, нешта тут не так». Ён кажа: «Аляксандр Рыгоравіч, ну з'язджаць яны з'язджаюць, але зубок вылечыць яны да нас едуць - тамака задорага». Я павінен вам сказаць, што мы ўрэгулюем цяпер гэтае пытанне, - сказаў Лукашэнка.

Дыктатар папракнуў беларусаў, якія прыязджаюць на радзіму з-за мяжы падлячыцца.

- Яны зубок прыязджаюць сюды за бесцань лячыць і іншыя хваробы за ваш кошт. Падаткі вы плаціце як фізічныя асобы, і прадпрыемства ваша таксама плаціць падаткі. А яны прыязджаюць за бесцань падлячыцца, - абурыўся Лукашэнка.

Нагадаем, артыкул 45 Канстытуцыі Беларусі, тэкст якога размешчаны на сайце Лукашэнкі, гарантуе ўсім грамадзянам Беларусі незалежна ад іх месца жыхарства «права на ахову здароўя, уключаючы бясплатнае лячэнне за кошт дзяржаўных сродкаў у парадку, устаноўленым законам».

«Дзяржава стварае ўмовы даступнага для ўсіх грамадзян медыцынскага абслугоўвання», – гаворыцца ў дакуменце.