Аналітык пераклаў на «нармальную мову» заяву Лукашэнкі

Нічога добрага рэжыму яна не абяцае.

У выступе Лукашэнкі на УНС выразна прасочваўся скразны канцэпт часу, які праходзіць праз усю яго прамову, адзначае аналітык Сяргей Чалы ў сваёй праграме «Ноч з Чалым»:

- З аднаго боку, зразумела, час - галоўны вораг старычыны, якому ён заўсёды саступае.

Але дэвіз гэтага сходу быў «Час выбраў нас». Такой расцяжкай была ўпрыгожаная зала, гэта было напісана на канструкцыях на Кастрычніцкай плошчы, гэтак жа называўся і канцэрт.

Чалы мяркуе, што ў паняцці Лукашэнкі гэтая фраза мае зусім іншае значэнне, адрознае ад першапачатковага.

- З майго пункту гледжання, гэта класічны прыклад таго выпадку, калі аўтар сказаў больш, чым хацеў.

Чаму "час выбраў нас"? Таму што напраўду ніхто з прысутных на УНС нікім не быў абраны. Вось і даводзіцца прыдумляць такія канструкцыі.

Далей, упершыню Лукашэнка выкарыстаў гэтую фразу 15 сакавіка на нарадзе, прысвечанай юбілею канстытуцыі. Вось такой была ягоная цытата: «Бог нам дапамог у 2020 годзе. Ён нас проста абараніў. Сёння яшчэ больш небяспечная сітуацыя. Ідзём па тонкім лёдзе, лішні няправільны крок - правалімся. Ніхто нас не ўратуе. А самі абараніць і выратаваць сябе мы не зможам. Таму час абраў нас».

На першы погляд здаецца, што адно з другога ніяк не выцякае, калі толькі не выказаць здагадку, што вось гэты «час абраў нас» акурат і азначае, што ты апроч сваёй волі апынешся ў абставінах непераадольнай сілы, дзе твой уласны лёс ад тваіх уласных дзеянняў ужо ніяк не залежыць. Застаецца спадзявацца толькі на Бога.

Калі здагадка дакладная, то раскрываецца сэнс выкарыстання гэтай жа фразы Лукашэнкі падчас УНС, калі ён сказаў: «Нам атрымалася апярэдзіць усе тэктанічныя зрухі ва ўсіх сферах…Цяпер надыходзіць час моцных… Але час абраў нас».

І вось гэтае «але» зноў усё выдае. Гэта значыць нават апярэдзіўшы ўсе тэктанічныя зрухі, Лукашэнка тым не менш выбірае альянс з выгнанцамі, а не з моцнымі, чый час цяпер прыйшоў. Таму час выбраў нас.

У перакладзе на звычайную мову гэта азначае: спадары, мы ў с..цы, - іранізуе Чалы.