У чатырох раёнах Беларусі не будуць прадаваць алкаголь

Вызначаныя дні.

У чатырох раёнах Беларусі ў 2024 годзе абмяжуюць продаж алкаголю. Такую пастанову прынялі мясцовыя ўлады. Дакументы апублікаваныя 17 траўня на Нацыянальным прававым інтэрнэт-партале.

Размова ідзе пра Жыткавіцкі раён Гомельскай вобласці, Слонімскі — у Гарадзенскай, а таксама аб Чавускім і Магілёўскім раёнах Магілёўскай вобласці.

У Жыткавіцкім раёне не будуць прадаваць спіртное ў крамах з васьмі гадзін раніцы 25 траўня і да васьмі раніцы 26 траўня, а таксама з васьмі раніцы 31 траўня да васьмі раніцы 1 чэрвеня. Гэта звязана з правядзенне ў школах мерапрыемстваў у гонар заканчэння навучальнага года.

Акрамя таго, алкаголь не будуць прадаваць у крамах падчас выпускных у школьнікаў. Абмежаванне будзе дзейнічаць з васьмі гадзін раніцы 14 чэрвеня да гэтага часу 15 чэрвеня.

У Слонімскім раёне будзе толькі адзін дзень цвярозасці - 25 траўня. З дзесяці гадзін раніцы і да 17 вечара крамы не будуць прадаваць гарэлку, лікёра-гарэлачныя напіткі, віно, каньяк, брэндзі, кальвадос, шампанскае і іншыя віды спіртнога з аб'ёмнай дзеллю этылавага спірту сем і больш адсоткаў.

У Магілёўскім і Чавускім раёнах дні цвярозасці пройдуць 25 траўня і 14 чэрвеня. Продаж спіртнога будзе забаронены з 00.00 да 24.00.

Пры гэтым будуць дзейнічаць выключэнні. У Слонімскім і Магілёўскім раёнах алкаголь можна будзе купіць на разліў у кавярнрі, барах і рэстарацыях, а ў Жыткавіцкім і Чавускім раёнах яго будуць прадаваць яшчэ і ў гандлёвых аб'ектах для правядзення рытуальных абрадаў, вясельных і юбілейных урачыстасцяў.