FT: На Захадзе хочуць адрадзіць атамную галіну з дапамогай пенсіянераў
6- 17.05.2024, 19:23
- 5,550
![FT: На Захадзе хочуць адрадзіць атамную галіну з дапамогай пенсіянераў](https://i.c97.org/p/articles/2015/ai-164049-aux-head-20150811_atom_radiacyja_t.jpg)
Навыкі пенсіянераў-атамшчыкаў цяпер «на вагу золата».
Заходнія атамныя кампаніі спрабуюць вярнуць на працу тысячы інжынераў і спецыялістаў, якія выйшлі на пенсію, каб рэалізаваць «самую вялікую хвалю новых праектаў за апошнія дзесяцігоддзі», піша Financial Times са спасылкай на апытаных экспертаў, урадавых чыноўнікаў і саміх пенсіянераў-атамшчыкаў.
Як адзначае газета, зараз заходнія кампаніі, якія будуюць новыя рэактары, імкнуцца наняць дзясяткі тысяч супрацоўнікаў. FT звязвае гэта з адраджэннем цікавасці да нізкавугляродных тэхналогій на фоне змены клімату і заве сітуацыю «срэбным цунамі» пенсіянераў (тэрмінам «срэбнае цунамі» прынята называць тэндэнцыю старэння насельніцтва Зямлі. — Заўв.).
Сярод краін, якія імкнуцца адрадзіць свае атамныя галіны, газета называе Індыю, ЗША, Францыю, Вялікую Брытанію і Польшчу. «Пенсіянеры са шматгадовым досведам работы карыстаюцца попытам пасля таго, як залатая эра галіны, якая пачалася ў канцы 1950-х гадоў, саступіла месца заняпаду пасля чарнобыльскай катастрофы 1986 года», — адзначаюць аўтары артыкула.
Як распавёў FT былы інжынер французскага дзяржаўнага атамнага аператара EDF 69-гадовы Жан-Марк Міракур, цяпер попыт на спецыялістаў атамшчыкаў на кадры значна перавышае прапанову, бо з'явіліся канкрэтныя праграмы па адраджэнні галіны. «Я любіў сваю працу. <...> Мы ведаем, што ёсць патрэба, і было б сорамна не падзяліцца нашым досведам», - адзначыў пенсіянер.
Акрамя Францыі, узрослы попыт на атамшчыкаў назіраецца ў ЗША, дзе да 2030 галіны спатрэбяцца амаль 55 тысяч новых спецыялістаў. FT звязвае цяперашні дэфіцыт кадраў з выхадам на пенсію хвалі «бэбі-бумераў». Так, паводле звестак французскай гандлёвай арганізацыі Gifen, з 60 тысяч новых супрацоўнікаў на асноўныя працоўныя месцы ў атамнай энэргетыцы, якія запатрабуюцца Францыі да 2033 году, палова неабходная для замены людзей, якія выходзяць на пенсію.
«Попыт [на пенсіянераў-атамшчыкаў] сапраўды вырас», – заявіла FT эксперт па энэргетыцы агенцтва Experconnect (спецыялізуецца на працаўладкаванні пенсіянераў) Мары-П'ер дэ Мантэсю. З яе слоў, праз шматгадовае скарачэнне інвестыцый у атамную галіну набор супрацоўнікаў быў замарожаны, а навыкі пенсіянераў сталі «на вагу золата».
Прадстаўнікі галіны ў размове з FT адзначылі, што праблема найму персаналу можа быць аблегчаная, калі ў яе прыйдзе моладзь, занепакоеная змяненнем клімату. Спецыялісты нагадалі, што ў атамнай энэргетыцы адсутнічаюць шкодныя выкіды. Так, кіраўнік кафедры ядзернай інжынерыі Мічыганскага ўніверсітэта Тод Ален адзначыў, што ў перыяд з вясны 2023 да 2024 года набор студэнтаў на яго факультэт падскочыў амаль на 50% — з 53 да 79 студэнтаў. «Доўгі час лічбы з кожным годам станавіліся меншымі. Цяпер нешта можа змяніцца», - указаў ён.