Зяленскі ў Дзень перамогі над нацызмам: Сёння ідэі Гітлера гучаць на расейскай мове

Прэзідэнт Украіны запісаў свой зварот у падвале, дзе расейцы трымалі палонных.

Прэзідэнт Украіны Уладзімір Зяленскі апублікаваў зварот з нагоды Дня памяці і перамогі над нацызмам у Другой сусветнай вайне (гэтая памятная дата ў краіне перанесеная з 9 на 8 траўня). Прэзідэнт запісаў свой зварот у вёсцы Ягадным у Чарнігаўскай вобласці - у падвале школы, дзе ў сакавіку 2022 года расейскія вайскоўцы ўтрымлівалі ў палоне сотні мясцовых жыхароў.

Прыводзім тэкст выступу ўкраінскага прэзідэнта:

- Яны ўрываюцца ў твой дом. Прыходзяць забіваць, спальваць, караць смерцю. Яны не шкадуюць нікога – паджылых людзей, жанчын, дзяцей… Яны – звяры…»

Гэта ўспаміны тых, хто перажыў акупацыю нацыстаў.

І гэта ўспаміны тых, хто перажыў расейскую акупацыю. Аднолькавыя жахі, злачынствы аднолькавых катаў.

80 гадоў таму мільёны ўкраінцаў змагаліся, каб нацызм саступіў назаўжды. Але сёння ўкраінцы зноў супрацьдзейнічаюць злу, якое адрадзілася, прыйшло зноў, хоча знішчыць нас зноў. Войска ката, які забівае, катуе, сцірае з твару зямлі мірныя гарады і вёскі. Зло, імя якому - расейскі фашызм. Скарочана - РФ.

Сведка гэтага - гэты склеп у сяле Ягадным на Чарнігаўшчыне. Рашысты загналі і трымалі тут амаль месяц жыхароў вёскі. Усіх. 350 чалавек. Усіх дзяцей гэтага сяла. 80 дзяўчынак і хлопчыкаў, самаму маладому з якіх - паўтара месяца. Кожны ў свеце можа зразумець, што такое пуцінская Расея, уявіўшы сябе тут, у гэтым падвале, сярод гэтых людзей. Без святла, ежы, вады, лекаў, паветра, у памяшканні, дзе было менш за метр на аднаго чалавека. Спалі седзячы. Выходзілі на двор толькі раз. Елі па 200 грамаў юшкі на дзень. Мужчын на марозе распраналі дагала, каб знайсці ўкраінскія татуіроўкі. Дзесяць закладнікаў тут памерлі. Іх забаранілі хаваць. Яшчэ 17 чалавек рашысты забілі. У кожным кутку свету гэта называюць адным словам: пекла. Калі спальваюць цэлыя вёскі, чыняць масавыя пакаранні, ставяць да сценкі з завязанымі вачамі і забіваюць. У кожным кутку свету гэта называюць адным словам: нацызм. Калі гэта не нацызм, што тады?

І ўсе на Зямлі ведаюць гісторыю і памятаюць, як змагацца з нацызмам. Калі чалавецтва аб'ядноўваецца, супрацьдзейнічае Гітлеру, а не набывае ў яго нафту і не прыходзіць да яго на інаўгурацыю.

Ягаднае, што перажыло пекла РФ - толькі адзін прыклад. Адно сяло, але яно адлюстроўвае ўсю сутнасць пуцінскага бачання свету. Сапраўдныя мэты. Заганяць пад зямлю ўсіх, хто хоча жыць вольна. Загнаць у склеп цэлае сяло, а далей - яшчэ адно, другое, а далей - усю Украіну, і нарэшце загнаць у склеп цэлы свет. Для РФ гэта проста этапы шалёнага плана: загнаць волю ў гета. Канцлагер пад назвай «расейскі свет». Экспартаваць па ўсім свеце галоўны расейскі здабытак - калючы дрот. Паводле таго ж сцэнару 80-летняй даўнасці аўтарства Гітлера, крок за крокам праглынаючы землі іншых і тэстуючы рэакцыю свету. І калі рэакцыя бесхрыбетная, нацысты ідуць далей. Іх не спыняюць заклікі, рэзалюцыі, палавінчатыя санкцыі. І адзінае пытанне, якое Пуціна хвалюе сёння: хто наступны?

Спіс дзяржаў, якія не могуць адчуваць сябе ў бяспецы, Расея афіцыйна зацвердзіла пад назвай «Спіс недружалюбных дзяржаў». Красамоўна, што ён амаль цалкам супадае са спісам дзяржаў антыгітлераўскай кааліцыі. Краіны, якія перамаглі нацызм - ворагі для сучаснай Расеі. Краіны Еўрапейскага Звяза, Вялікай Брытанія, ЗША, Канада і агулам блізу паўсотні дзяржаў. Вольныя, дэмакратычныя і незалежныя, што ў сучаснай крамлёўскай ідэалогіі значыць - небяспечныя. А значыць - мішэні.

Свет не бачыў пагрозы, свет праспаў адраджэнне нацызму - а 5 раніцы 24 лютага 2022 года. І сёння ўсе, хто памятае Другую сусветную і дажыў да нашых дзён, адчуваюць дэжавю. Бітва за Кіеў, бамбаванні Харкава, Адэсы, Дняпра, масавыя магілы, блакада партоў, крадзёж і вываз збажыны, катаванні, пакаранні смерцю, дэпартацыя дзяцей, фільтрацыйныя лагеры, калоніі для палонных. Старонкі з падручнікаў пра Другую сусветную Расея вярнула ў загалоўкі сусветных СМІ. Страшнае мінулае Расея вярнула ў стужку штодзённых навін. Даводзячы з кожным новым злачынствам - нацызм адрадзіўся. Толькі з новай маркіроўкай: «Зроблена ў Расеі».

Нядаўна наша грамадства кранула фота мужчыны ля магілы ўнука, які загінуў на вайне. Бацька гэтага чалавека загінуў ад рук нацыстаў. Жыццё яго ўнука забралі расейскія акупанты. Гэта ўсяго адзін з мільёнаў прыкладаў, якія ставяць паміж нацызмам і сучаснай Расеяй знак роўнасці.

Сёння ідэі Гітлера гучаць на расейскай мове. Злачынствы нацыстаў учыняюцца пад расейскім сцягам. Адрозненне фармальнае. Новы вермахт, які ўварваўся ва Украіну, носіць на рукавах двухгаловага арла. Новыя «Фаў» - гэта «калібры» і «кінжалы», новыя Люфтвафэ - МіГі і «сушкі», новая свастыка - «зэтка», новы «Гітлеругенд» — «Юнармія». Такіх паралеляў - дзясяткі, такіх перайманняў - сотні.

І калі сучасны Крэмль паходзіць на Трэці рэйх ва ўсім, то і канец яго павінен быць ідэнтычны.

У новым Нюрнбергу. У горадзе Гаазе.

Як і ў 1945-м, гэта здольны зрабіць толькі аб'яднаны вольны свет. Аб'яднаны ў антыпуцінскую кааліцыю. Не словамі, а дзеяннямі, здольнымі спыніць нацыстаў Масквы, не даць новаму злу распаўсюдзіцца на ўвесь Еўрапейскі кантынент, а затым і на ўвесь свет. Здольны дапамагчы Украіне перамагчы расейскі нацызм, дапамагчы сабе, дапамагчы свету, каб давесці адданасць словам «Ніколі зноў!».

Каб «Ніколі зноў!» зноў было актуальным.

Дарагія ўкраінцы!

Жыхароў сяла Ягаднага трымалі тут 27 дзён. 30 сакавіка 2022 года сяло было вызваленае ад рашысцкіх акупантаў. 19 красавіка - размінаванае нашымі сіламі. Гэта сімвал таго, што гісторыя паўтараецца, і кожны, хто прыйшоў знішчаць нас, нарэшце будзе ўцякаць з украінскай зямлі. Частка нашых тэрыторый пакуль застаецца акупаванай, частка нашых людзей - у палоне. Гэта значыць, што нашая бітва працягваецца. І сёння, у Дзень памяці і перамогі над нацызмам, успамінаючы мільёны ўкраінцаў, якія разам з іншымі народамі змагаліся і перамаглі, мы верым і набліжаем новы дзень новай перамогі.

Калі выгнанне нацыстаў з Украіны, пра якое мы чыталі ў падручніках гісторыі, адбудзецца ў рэальным жыцці. І падзея сярэдзіны ХХ стагоддзя адбудзецца зноў і ўвойдзе ў гісторыю ХХІ стагоддзя. Гісторыю агульнай перамогі над расейскім злом.

З Днём памяці і перамогі над нацызмам у Другой сусветнай вайне!

Слава Украіне!