Ці варта баяцца перамогі Ле Пэн у Францыі?

Палітолаг мяркуе, што «Нацыянальнаму аб'яднанню» давядзецца мяняцца.

Правая партыя Марын Ле Пэн «Нацыянальнае аб'яднанне» перамагла ў першым туры парламенцкіх выбараў у Францыі, набраўшы 33,15% галасоў. На другім месцы - левыя. Альянс Макрона - трэці, чацвёртыя - рэспубліканцы. Якія могуць быць варыянты ў другім туры?

Пра гэта і не толькі сайт Charter97.org пагаварыў са славацкім палітолагам і прэзідэнтам Інстытута грамадскіх праблем (IVO) (Браціслава) Рыгорам Месежнікавым.

- Паводле выбарчага закона павінен быць праведзены другі тур. Цалкам магчыма, што там будуць пэўныя дамоўленасці паміж асобнымі кандыдатамі на карысць тых, якія бліжэй да гэтых партый. Я не асабліва паглыбляўся ў матэматычныя прагнозы другога туру французскіх выбараў, але па выніках першага туру цалкам відавочна, што партыя Макрона не пераможа на гэтых выбарах.

Найлепшыя вынікі на гэтых выбарах паказалі прадстаўнікі правых і левых радыкальных сіл. Партыя Марын Ле Пэн з'яўляецца, фактычна, праварадыкальнай сілай, а Жан-Люк Меланшон прадстаўляе неакамуністычных левых. Так што дакладна спрагназаваць вынікі пакуль складана, трэба пачакаць другога тура, каб убачыць больш пэўны расклад сіл.

- Макрон мае намер адклікаць кандыдата ў з другога тура парламенцкіх выбараў больш чым у 60 акругах, каб не даць «Нацыянальнаму аб'яднанню» Марын Ле Пэн атрымаць абсалютную большасць у парламенце. Ці дапаможа яму гэтая тактыка?

- Мяркуючы па ўсім, ён будзе здымаць сваіх кандыдатаў у тых акругах, дзе ў левых добрыя шанцы, у леварадыкальнага блока. Але я не ўпэўнены, што выбарцы Макрона падтрымаюць гэтую партыю, бо яе раней партыя дзейнага прэзідэнта Францыі востра крытыкавала, прычым левыя адказвалі ёй вельмі агрэсіўна. Можна сказаць, што для іх левыя - гэта ідэалагічныя апаненты, можа быць, менш радыкальныя, чым партыя Ле Пэн, якая для іх наогул як чырвоная ануча.

Агулам, вядома, гэтая тактыка можа часткова аслабіць вынікі Ле Пэн, але мяркуючы па выніках першага тура выбараў, пакуль яе партыя выглядае пераважней для вялікай колькасці французаў. Сам факт, што партыя Макрона пацярпела такую паразу, для Францыі гэта моцны ўдар, для сярэдніх партый такога тыпу.

Усё ж лібералы ў Францыі заўсёды карысталіся вялікай падтрымкай, а цяпер яны саступілі свае моцныя пазіцыі прадстаўнікам радыкальных партый. Гэта перафарматуе ўсю партыйную сістэму і, мяркуючы па ўсім, паўплывае на характар дзяржавы таксама і цалкам магчыма, што на замежную палітыку.

- Ці варта асцерагацца партыю Ле Пэн, бо мы бачылі ўжо прыклад Італіі, дзе перамаглі правыя, а прэм'ер Мелоні, насуперак прагнозам, актыўна падтрымлівае Украіну і займае канструктыўную пазіцыю ў ЕЗ?

- Паміж Мелоні і Ле Пэн вялікая розніца, бо Марын Ле Пэн адкрыта ездзіла ў Маскву і наўпрост падтрымлівала Пуціна. Расея фінансавала партыю Ле Пэн. Нічога падобнага ні з Мелоні, ні з яе партыяй не здаралася, гэта значыць, былі пэўныя сумневы наконт характару гэтай партыі, якую Мелоні ўзначальвае. Тамака, магчыма, выяўляліся асобныя тэндэнцыі нейкіх прарасейскіх пазіцый у некаторых дзеячаў. Але нічога гэтага не пацвердзілася на ўзроўні вышэйшага кіраўніцтва, у Мелоні ніякіх асабістых стасункаў з Пуціным не было, і, я думаю, не будзе і ў будучыні.

Што да Ле Пэн, то варта ўлічваць яе кантакты з Крамлём і справы, звязаныя з фінансавай падтрымкай яе партыі з боку Масквы. Яна, вядома, будзе зараз імкнуцца больш умерана выказвацца і спрабаваць заняць больш цэнтрысцкую пазіцыю. Магчыма, гэта будзе звязанае з менш радыкальнымі пазіцыямі наконт расейска-ўкраінскай вайны, у тым сэнсе, што ў дачыненні да Расеі будуць мякчэйшыя пазіцыі.

Аднак нельга скідаць з рахункаў, што кандыдат гэтай партыі Жордан Бардэла на пасаду прэм'ер-міністра ў сакавіку гэтага года павіншаваў Пуціна з «пераабраннем» на пасаду прэзідэнта», а пра Расею ён адклікаўся не як пра супраціўніка, а як партнёра.

Можа быць, гэта нейкім чынам зараз памяняецца, але што будзе поўны пераход праварадыкальнай партыі на пазіцыю падтрымкі Украіны, шчыра кажучы, у гэта цяжка паверыць. Плюс яшчэ партыя Меланшона, яны ж таксама ў нейкай ступені прарасейскія, левая партыя не з'яўляецца праатлантычнай, яна да таго ж яшчэ і еўраскептычная. Так што, я думаю, Францыю чакаюць вельмі складаныя часы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com