Lawtrend: З 2020-га года ў Беларусі ліквідавана не менш за 1696 НКА

Колькасць арганізацый, якія прынялі пастанову аб самастойнай ліквідацыі, зменшылася.

За перыяд пасля прэзідэнцкіх выбараў 2020 года і да канца чэрвеня 2024-га ў Беларусі ліквідавана не менш як 1.696 некамерцыйных арганізацый (НКА) - аб'яднанняў, прафзвязаў, фондаў, недзяржаўных устаноў і асацыяцый. Як піша «Позірк», пра гэта гаворыцца ў новым аглядзе праваабарончай арганізацыі Lawtrend.

На канец траўня было ліквідавана не менш як 1.665 НКА, красавіка - 1.622, сакавіка - 1.601, лютага - 1.563, студзеня - 1.533, снежня 2023-га - 1.509. На канец снежня 2022 года налічвалася 1.173 закрытыя некамерцыйныя арганізацыі.

Паводле інфармацыі праваабаронцаў, на канец чэрвеня не менш за 1.061 НКА знаходзілася ў працэсе прымусовай ліквідацыі (1.033 - у канцы траўня, 1.003 - красавіка, 997 - сакавіка, 981 - лютага, 969 - студзеня, 960 - снежня 2023-га) з улікам пададзеных у суд пазоваў, прымусовага выключэння з Адзінага дзяржрэгістра юрыдычных асоб і індывідуальных прадпрымальнікаў.

Колькасць арганізацый, якія прынялі пастановы аб самастойнай ліквідацыі, зменшылася. На канец чэрвеня такіх было 635, траўня - 632, красавіка - 619, сакавіка - 604, лютага - 582, снежня 2023-га - 564, снежня 2022-га - 416.

Адзначаецца, што пастанова аб самаліквідацыі па-ранейшаму прымаецца ў асноўным праз ціск на сяброў НКА, неспрыяльнага прававога асяроддзя і грамадска-палітычнай сітуацыі.

Lawtrend падкрэслівае, што ў Беларусі ўжо некалькі гадоў у дачыненні да грамадзянскіх актывістаў, прадстаўнікоў арганізацый грамадзянскай супольнасці актыўна выкарыстоўваецца заканадаўства аб супрацьдзеянні экстрэмізму. Улада «прызнае экстрэмісцкімі розныя дзеянні, якія супярэчаць выбранаму ёю курсу».

«Памяншэнне колькасці некамерцыйных арганізацый, якія прымаюць пастанову аб ліквідацыі, з'яўляецца дадатковым фактарам, які сведчыць аб некаторай «нармалізацыі» сітуацыі ў краіне. Большасць некамерцыйных арганізацый, якія не бачаць магчымасці працягваць сваю дзейнасць у сувязі са складанай грамадска-палітычнай сітуацыяй у краіне, ужо прынялі пастанову аб самастойнай ліквідацыі або прыпынілі дзейнасць (у апошнім выпадку, яны існуюць або толькі «на паперы», або ў дачыненні да іх падаецца пазоў аб прымусовай ліквідацыі)», - адзначаюць праваабаронцы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com