NBC News пра Курскі прарыў: Украіна шукала магчымасць такога наступу больш за год
2- 17.08.2024, 19:57
- 3,392
![NBC News пра Курскі прарыў: Украіна шукала магчымасць такога наступу больш за год](https://i.c97.org/ai/461430/aux-head-1648649065-202200313_jax_360.jpg)
У Кіеве кажуць, што УСУ застануцца ў Курскай вобласці «столькі, колькі спатрэбіцца».
Украінскае кіраўніцтва больш за год разглядала магчымасць правядзення буйной наступальнай аперацыі, падобнай наступу ў Курскай вобласці.
Пра гэта амерыканскаму выданню NBC News паведаміў на ўмовах ананімнасці "старэйшы дарадца ўкраінскага ўрада".
Са слоў дарадцы, адной з галоўных мэт аперацыі было адцягнуць намаганні і ўвагу Расеі ад іншых месцаў на лініі фронту працягласцю блізу тысячы кіламетраў, асабліва з усходу, дзе расейскія войскі павольна разрываюць абарону Украіны.
Таксама NBC News прыводзіць словы іншага дарадцы кіраўніка Офіса прэзідэнта Украіны - Міхаіла Падаляка - які казаў адкрыта. З ягоных слоў, адной з задач бягучай аперацыі на Куршчыне з'яўляецца знішчэнне вайсковай інфраструктуры Расеі, якая выкарыстоўваецца для нападаў праз мяжу на ўкраінскія Сумскую, Чарнігаўскую і Харкаўскую вобласці.
- Ёсць вялікая розніца паміж гэтым і тыпам вайны, якую вядзе Расея. Украіна ідзе зусім з іншымі мэтамі. Украіна не плануе акупаваць [назаўжды] гэтую тэрыторыю. Гэта часова, - сказаў Падаляк.
Ён адмаўляе, што Украіна мела якія-небудзь планы па захопе Курскай АЭС, пра што казалі расейскія афіцыйныя асобы. Разам з тым Падаляк запэўніў, што ўкраінскія сілы застануцца на занятых тэрыторыях Расеі столькі, колькі спатрэбіцца для дасягнення мэт Кіева.