Магчымы кацёл: Украіна адрэзала 700 расейскіх дэсантнікаў ад забеспячэння
5- 19.08.2024, 9:25
- 11,468
![Магчымы кацёл: Украіна адрэзала 700 расейскіх дэсантнікаў ад забеспячэння](https://i.c97.org/ai/501931/aux-head-1654847831-20220610_artillery_360.jpg)
Знішчаны трэці мост у Курскай вобласці.
Сілы абароны Украіны, магчыма, знішчылі трэці і апошні мост праз раку Сейм у населеным пункце Карыж Курскай вобласці, адрэзаўшы такім чынам расейскія войскі ад шляхоў забеспячэння ў Глушкоўскім раёне, паведамляе расейскі Telegram-канал Astra са спасылкай на Z-«ваенкараў» у панядзелак, 19 жніўня.
Адзначаецца, што жыхары Глушкаўскага раёна Курскай вобласці эвакуаваліся на лодках 18 жніўня.
Калі падрыў апошняга моста праз Сейм пацвердзіцца, то падраздзяленні расейскага войска, якія знаходзяцца на поўдзень, апынуцца ў «катле», а прыблізная плошча акружэння будзе складаць амаль 700 квадратных кіламетраў, піша «Цензор.нет».
16 жніўня Сілы абароны Украіны падарвалі самы буйны мост на гэтым адцінку фронту - у сяле Глушкава. На наступны дзень быў узарваны мост крыху на поўнач, у Званым. 18 жніўня гэта пацвердзіў камандзір Паветраных сіл УСУ Мікалай Аляшчук.
Украінскі ваенны аглядальнік Васіль Пехньё ў эфіры Radio NV распавёў, што пасля падрыву мастоў у аблозе Сіл абароны могуць застацца 700-800 расейскіх дэсантнікаў.