Паўднёвая Карэя пачала расследаванне супраць Telegram
2- 2.09.2024, 18:09
- 2,068
![Паўднёвая Карэя пачала расследаванне супраць Telegram](https://i.c97.org/ai/286764/aux-head-1523970037-20180417_telegram-t.jpg)
Сеул будзе супрацоўнічаць з Парыжам.
Паліцыя Сеула пачала расследаванне супраць Telegram, кампанію падазраюць у «дапамозе і падбухторванні» да распаўсюджвання парнаграфічных выяў з дыпфэйкамі (рэалістычнай падменай фота-, аўдыё-і відэаматэрыялаў, створанай з дапамогай штучнага інтэлекту), паведамляе Yonhap.
Кіраўнік Нацыянальнай следчай управы паліцыі Паўднёвай Карэі У Чон Су заявіў, што расследаванне ўскладненае, бо Telegram не падае звестак, такіх як інфармацыя аб рахунках і ўладальніках, не толькі паўднёвакарэйскім уладам, але і следчым органам іншых краін, напрыклад ЗША.
«У нас ёсць уласныя метады, і мы зробім усё магчымае для расследавання», – сказаў У, дадаўшы, што Сеул будзе супрацоўнічаць з праваахоўнымі органамі Францыі, дзе ідзе працэс над заснавальнікам платформы Паўлам Дуравым.
Yonhap адзначае, што гэта першае расследаванне супраць Telegram у Паўднёвай Карэі. Яно тычыцца васьмі робатаў, якія генеруюць фэйкавыя матэрыялы з сэксуальным кантэнтам, а таксама каналаў, якія распаўсюджваюць гэтыя выявы. З 26 да 29 жніўня паліцыя атрымала 88 скарг і выявіла 24 падазроных. Аб праблеме распаўсюджвання порнадыпфэйкаў казаў прэзідэнт Юн Сок Ёль, не згадаўшы Telegram наўпрост.
Адмова ад супрацоўніцтва з уладамі ёсць сярод пунктаў абвінавачання, якое Дураву выставіла французская пракуратура пасля затрымання прадпрымальніка ў аэрапорце Ле Буржэ. Французскія следчыя ставяць у віну суўдзел у кіраванні онлайн-платформай для ажыццяўлення незаконных транзакцый, збыце наркотыкаў і махлярстве ў складзе арганізаванай групы. Пасля чатырох дзён пад вартай Дурава адпусцілі пад заклад €5 млн, забаранілі пакідаць Францыю і абавязалі адзначацца ў паліцыі двойчы на тыдзень.
У Telegram заявілі, што мадэрацыя на платформе адпавядае стандартам, каманда мэсэнджара выконвае законы ЕЗ, а вінаваціць заснавальніка платформы ў злоўжываннях карыстальнікаў абсурдна.