Чаму Лукашэнка выглядае так недарэчна?

Дыктатар усё больш дэградуе.

Чым далей, тым больш складаецца ўражанне, што правіцелю ўсё адно, што пра яго думаюць людзі як унутры Беларусі, так і за мяжой.

У сетцы ўсё часцей можна натрапіць на падобныя думкі і довады. Ды і самі мы гэта заўважаем.

Узяць хаця б вонкавы выгляд: паводле таго, як Лукашэнка цяпер апранаецца, напрошваецца выснова, што яму начхаць, што пра яго падумаюць. Хаця яшчэ каля дзесяці гадоў таму ён казаў:

«Для прэзідэнта ёсць пэўны стандарт – ён і ў адзенні, і ў гальштуках, і ў кашулях, і ў гадзінніках… Я хоць і вясковы хлопец, але прывык, каб у мяне былі штаны пагладжаныя, касцюм больш-менш прыстойны… Я прадстаўляю краіну».

Сёння правіцель не саромеецца з’яўляцца перад камерамі, нібыта ён не ў працоўнай паездцы па краіне або не на перамовах за мяжой, а быццам выскачыў на пяць хвілін з дому ў агарод нащыпаць цыбулі з градкі.

Ці то Лукашэнка не спадзяецца вярнуць частку былых сімпатый беларусаў, ці то яшчэ з нейкай прычыны, але ён пастаянна атакуе розныя пласты насельніцтва нападкамі.

І моладзь не тая, і мужчыны не тыя, і жанчыны не тыя («Дзяўчынкі нараджаць не хочуць… Ну, не ўсе. Ёсць і нармальныя жанчыны, якія нараджаюць»). Ды наагул усе навокал толькі «ціктокаюцца», «ныюць і воюць».

Ён быццам махнуў рукой і на тое, што пра яго думаюць у свеце. Адкрыта падтаквае Пуціну і таргуецца з амерыканцамі наконт палітычных закладнікаў.

Былы «змагар з карупцыяй» нібыта зусім перастаў сачыць за тым, чым варочаюць ягоная сям’я і набліжаныя.

Старэйшы сын правіцеля падаўся ўжо і ў рэстаратары, сярэдні даўно зарабляе на БелАЗах, унук зарэгістраваў кампанію ў «аршанскім афшоры». Да кармушкі прыстроены нявесткі, іх падругі, муж унучкі і г.д., і да т.п.

Сам Лукашэнка заняты тым, як уладкаваць бізнес для набліжаных. Нядаўнія сустрэчы ў Пекіне ён правёў у стылі мафіёзі – адкрыта прасоўваў інтарэсы набліжаных да яго бізнесоўцаў Дзмітрыя Баскава і Сяргея Цяцерына.

На нямыя пытанні з боку электарату прапагандысты, па сутнасці, адказваюць: вам, халопам, нічога ведаць і не трэба.

Лукашэнка пастаянна і красамоўна дэманструе, што занепакоены найперш інтарэсамі свиты, чыноўнікаў і сілавікоў.

З апошняга. Канец верасня, карціна алеем: пакуль Лукашэнка імітуе на камеру вымову, высокапастаўленыя чыноўнікі спакойна адказваюць, ведаючы, што ніякіх наступстваў не будзе. У гэты час за спектаклем з усмешкай назірае бізнесмен Цяцерын, а сілавікі ахоўваюць Лукашэнку ад кукурузы.

Магчыма, у будучыні перыяд кіравання Лукашэнкі будзе ілюстраваць, у тым ліку, адзін з падобных кадраў.

Андрэй Карась, «Салідарнасць»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com