Кіраўнік Мінтранса РФ не ў стане спыніць авіякалапс у аэрапортах

Тысячы расейцаў затрымаліся ў аэрапортах.

Міністэрства транспарту РФ, якое пасля смерці ранейшага кіраўніка ведамства Рамана Старавойта ўзначаліў яго намеснік Андрэй Нікіцін, не ў стане паўплываць на сітуацыю ў расейскіх аэрапортах, якія чарговы раз сутыкнуліся з масаванымі налётамі дронаў УСУ.

Пра гэта заявіў сам Нікіцін, які ў размове з журналістамі запэўніў, што Мінтранс будзе «спрабаваць нешта зрабіць» ва ўзаемадзеянні з Мінабароны РФ. На яго думку, аэрапорты, якія ў мінулыя выхадныя перажылі ўжо чацвёрты сёлета транспартны калапс з масавымі затрымкамі рэйсаў, «прыстасоўваюцца» да абставінаў, дапамагаюць пасажырам з харчаваннем і адпачынкам.

«Цяпер ужо крыху лепш, чым было ў траўні. Калегі аналізуюць сваю працу. І, я лічу, увогуле дынаміка ёсць. Але ў цэлым ні аэрапорты, ні авіякампаніі прадказаць гэта [закрыццё аэрапортаў з прычыны абвяшчэння плана «Дыван»] не могуць», - сказаў ён і падкрэсліў, што ў прыярытэце - бяспека пасажыраў.

З 19 па 21 ліпеня на фоне ўзмацнення нападаў украінскіх беспілотнікаў у аэрапортах Масквы, па падліках «Ведамасцяў» і РБК, былі затрыманыя і адмененыя больш за 1000 рэйсаў. Як нагадалі ў Асацыяцыі тураператараў Расеі (АТОР), гэта ўжо чацвёрты з мая, з пачатку высокага турсезона, калапс у аэрапортах маскоўскага авіявузла. Да гэтага масавыя адмены і затрымкі рэйсаў мелі месца 6 траўня, затым 10 чэрвеня і 5-7 ліпеня.

Паводле ацэнкі аналітыкаў АТОР, праз гэтыя крызісы за тры месяцы пацярпелі сама меней 200 тысяч пасажыраў, або кожны дзясяты з усіх, хто карыстаўся паветраным транспартам. А тых турыстаў, якім прыйшлося чакаць працяглыя затрымкі рэйсаў, - «на парадак больш», адзначылі ў асацыяцыі.

Там удакладнілі, што за тры месяцы аэрапорты Унукава, Жукоўскі і Шарамецева закрываліся ва ўмовах атак беспілотнікаў амаль па 20 разоў кожны, а Дамадзедава — больш за 20 разоў. У Калузе гэтая лічба перавысіла 25, у Саратаве - 15. Больш за 10 разоў спынялі працу аэрапорты Санкт-Пецярбурга, Казані, Тамбова і Яраслаўля. Акрамя таго, план «Дыван» неаднаразова ўводзілі ў аэрапортах яшчэ 28 расейскіх гарадоў.

Сумарная працягласць закрыцця кожнага з маскоўскіх аэрапортаў у траўні-ліпені перавысіла содні, падлічылі ў АТОР. Даўжэй за ўсё - больш за 60 гадзін - не працаваў аэрапорт «Дамадзедава», больш за 45 гадзін – «Унукава» і звыш 30 гадзін – «Шарамецева».

Тым часам у Расавіяцыі заявілі, што не разглядаюць пытанне кампенсацыі страт авіякампаніям, якія ў суме, паводле ацэнак экспертаў, могуць дасягаць 20 млрд. рублёў за суткі калапсу. Са слоў кіраўніка агенцтва Дзмітрыя Ядрова, гэтая тэма зараз не абмяркоўваецца. «Андрэй Сяргеевіч [Нікіцін] накіраваў адпаведныя прапановы ва ўзаемадзеянні <…>. Прапановы на наступным тыдні можна абмеркаваць, нейкія механізмы ўзаемадзеяння паміж ведамствамі», - адзначыў ён.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com