Сябар Пуціна аказаўся суўладальнікам Ozon

Украіна наносіць удары па складах маркетплэйса.

Кампанія «Дэльта» мільярдэра Генадзя Цімчэнкі, блізкага да прэзідэнта Расіі, аплаціла куплю амаль 35% акцый Ozon. Гэта высветліў Фонд барацьбы з карупцыяй (ФБК), вывучыўшы справаздачнасць маркетплэйса і іншыя фінансавыя дакументы. Раней гэты пакет належаў інвестфонду Baring Vostok, але пасля яго сыходу з расійскага рынку праз вайну ва Украіне 27,71% акцый былі прададзены фірме O23 бізнесмена Аляксандра Чачавы за 38,2 млрд рублёў, а потым яна павялічыла долю да 34,95%.

ФБК прасачыў ланцужок уласнасці ад O23 праз фірму «Карпарацыя 42» да кампаніі Чачавы «Стратасфера» і крыніцу сродкаў на гэтую здзелку. Так, «Стратасфера» ў 2024 годзе атрымала пазыку на 51,23 млрд рублёў. Такую суму, згодна з бухгалтарскай справаздачнасцю, ёй выдала кампанія «Аптыма», а тая, у сваю чаргу, атрымала гэтыя грошы ў выглядзе бяспрацэнтнай пазыкі ад «Дэльты», праз якую Цімчэнка з 2017 года валодае 17% акцый «Сібура». Самога Чачаву ФБК лічыць намінальным уласнікам акцый Ozon, бо ён пачаў скупляць буйныя лічбавыя актывы пасля ўварвання Расіі ва Украіну, а да таго ў маштабных здзелках заўважаны не быў.

Аўтары расследавання таксама ўказалі на сувязі кіраўніцтва «Аптымы» з бізнесам людзей з асяроддзя Уладзіміра Пуціна. Гендырэктар кампаніі Дар’я Брылякова раней працавала на аўтадроме «Ігора Драйў», запісаным на пляменніка прэзідэнта Міхаіла Шэломава, і ў «АБР Менеджменце», падкантрольным сябру кіраўніка дзяржавы мільярдэру Юрыю Кавальчуку, а галоўная бухгалтарка Жанна Цаплева — у фірме «Рэлакс» Святланы Крываногіх, каханкі Пуціна, ад якога ў яе дачка.

ФБК прыйшоў да высновы, што здзелка магла быць здзейсненая ў інтарэсах Пуціна, і заклікаў ЕС увесці санкцыі супраць асоб і кампаній, звязаных з Ozon. На карысць гэтага сцвярджэння можа сведчыць тое, што менавіта 22 жніўня, калі ўкраінскія дроны ўпершыню ўдарылі па складах Ozon, прэзідэнт рэзка ўзмацніў рыторыку, абвінаваціўшы Кіеў у «адкрыцці скрыні Пандоры».

Пасля анексіі Крыму Пуцін называў Цімчэнку сярод сваіх сяброў, якія, на яго думку, незаслужана пацярпелі ад заходніх санкцый. Бізнесмен быў заснавальнікам кампаніі Gunvor, якая да 2014 года прадавала на экспарт каля траціны ўсёй расійскай нафты. Мінфін ЗША заяўляў, што дзейнасць мільярдэра ў энергетычным сектары была наўпрост звязаная з Пуціным, які меў інвестыцыі ў Gunvor і доступ да сродкаў кампаніі.

Таксама бізнесмен быў сузаснавальнікам банка «Расія», вядомага як «банк сяброў Пуціна». Пры гэтым ФБК устанавіў, што структуры Цімчэнкі неаднаразова фінансавалі актывы і аплачвалі выдаткі, звязаныя з прэзідэнтам і яго асяроддзем. Паводле звестак расследавальнікаў, між іншым, мільярдэр даваў грошы на будаўніцтва «палаца» ў Геленджыку, бізнес дачок Пуціна і фонд маці двух яго сыноў — Аліны Кабаевай.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com