Фотарэпартаж: былы лётчык разводзіць у Менску мэйн-кунаў

Гадавальнік Барыса Мялешына KisBis пачынаўся сем гадоў таму з адной кошкі пароды мэйн-кун.

Менчук Барыс Мялешын у мінулым - грамадзянскі лётчык. Выйшаўшы на пенсію, ён вырашыў знайсці сабе справу для душы, добра, што маленькі парфумерны бізнес дазваляе не лічыць кожную капейку. У выніку Барыс Віктаравіч абраў сабе захапленне не з танных - мужчына разводзіць мэйн-кунаў, катоў адной з самых дарагіх і ўжо сапраўды самай буйной пароды. Пра тое, хто з беларусаў можа дазволіць сабе хатнюю жывёлу за $1000, адкуль у нашай краіне столькі прэстыжных гадавальнікаў і што важней - кацяня або iPhone, чытайце ў рэпартажы onliner.by.

Гадавальнік Барыса Мялешына KisBis пачынаўся сем гадоў таму з адной кошкі пароды мэйн-кун. Яе запатрабавала сабе ў падарунак жонка Барыса, ужо, дарэчы, былая. Тады за пародзістую жывёлу заводчык выклаў немалыя грошы - $1500.

- Зараз, вядома, мэйн-куны каштуюць танней. Сярэдні кошт кацяня з дакументамі - $750. Калі гаворка ідзе пра жывёлу аднатоннай афарбоўкі, чыста чорную або чыста белую (гэта лічыцца рэдкасцю), то кошт будзе пачынацца ад $900. Мой дарослы інтэрчэмпіён Арнэст, пажадай я яго прадаць, абышоўся б пакупніку ў $3000, - кажа Барыс.

З заводчыкам і яго гадаванцамі журналісты сустрэліся ў маленькай заакраме, якой валодае знаёмая былога лётчыка. Руды Арнэст, чорны Барні, белы Чэстэр і каляровая Багіра, якая акацілася два тыдні таму, паводзяць сябе прыстойна. Меланхалічна паварочваюць пухнатыя галовы з шыкоўнымі вушамі, якія дасталіся ў спадчыну ад продкаў - рысяў. Не кусаюць, не ядзяць шнуркі і не драпаюць незнаёмцаў-журналістаў. А маглі б.

- Што вы! Мэйн-кун - гэта самая інтэлектуальная парода. Яны такія ж добразычлівыя і адданыя, як і сабакі. Усюды ідуць за сваім гаспадаром, - запэўнівае Барыс.

- То бок, у іх абсалютна не каціны характар?

- Каціны. Але інтэлект у іх самы высокі сярод катоў. Яны будуць хадзіць за табой, паказваючы, што трэба прыбраць латок. Могуць і тапкі гаспадару прыносіць, калі прывучыць, - усміхаецца заводчык. - Наогул, лепшае параўнанне для мэйн-кунаў - гэта параўнанне з львамі ў прайдзе. Два дарослых ката ніколі не змогуць ужыцца на адной тэрыторыі, будуць змагацца за дамінаванне. Усё як і ў львоў. Таму ў кожнага ката павінен быць свой гаспадар - толькі тады яны жывуць паўнавартасным жыццём.

Барыс кажа, што мэйн-куны для яго - гэта не бізнес. Ён займаецца толькі селекцыяй, а не продажам, дамагаецца найлепшых нашчадкаў, паляпшае пароду. Выведзеных кацянят аддае сябрам у добрыя рукі.

Дзеці Арнэста і Багіры нарадзіліся два тыдні таму. Зараз яны толькі адкрылі вочкі. Кожнаму памёту ў гадавальніку прысвойваецца свая літара англійскага алфавіту , тлумачыць заводчык. Малюсенькім рудым стварэнням дасталася H, а папярэднія кацяняты, якія нарадзіліся два месяцы таму, называюцца G.

- У свеце існуе дзве агульнапрызнаныя федэрацыі фелінолагаў: еўрапейская FIFe (Federation Internationale Feline) і амерыканская WCF (World Cat Federation). Пры гэтым яны адзін аднаго, скажам так, не прызнаюць. Усе тытулы, заваяваныя катом у адной сістэме, нічога не значаць у іншай, - уводзіць у тонкасці феліналагічнага свету менчук.

- Мяркуючы па аб'явах, у Менску шмат афіцыйных і не вельмі гадавальнікаў мэйн-кунаў. Адкуль у беларусаў з сярэдняй зарплатай у $500 такі вялікі попыт на дарагіх жывёл?

- Скажу вам, раней мэйн-куны каштавалі яшчэ даражэй. З гадамі яны, як і іншыя пародзістыя каты, усё больш падаюць у кошце. У свой час дырэктар нашай феліналагічнай асацыяцыі прадала машыну, каб купіць сабе персідскую котку. А зараз перса з дакументамі можна і за $70 набыць. Гэтак жа і з мэйн-кунамі адбудзецца. Калі я пачынаў, у горадзе іх былі лічаныя адзінкі. А цяпер на выставах ці ледзь не палова - куны, - наракае заводчык.

- Зараз кацяня каштуе як iPhone, а iPhone ёсць у кожнага другога беларуса. Але хіба можна параўнаць нейкі там гаджэт з адданым сябрам? - разважае Сяргей, гаспадар Барні і прыяцель Барыса.

- Кацяняты без дакументаў каштуюць на $300 танней. Калі хочаце жывёлу выключна для сябе, то можна пагадзіцца і на такі варыянт. Але пры гэтым вы павінны разумець, што ў выставах ваш гадаванец удзельнічаць не зможа, за чэмпіёнскі тытул не пазмагаецца. Раней у гэтым выпадку самцоў яшчэ і кастрыравалі, каб выключыць канкурэнцыю, але цяпер ад такой практыкі адмовіліся. Калі прадаўцы бачаць, што чалавек вельмі хоча мэйн-куна, але не можа сабе яго дазволіць, заўсёды ідуць насустрач, знаходзяць самы просты варыянт без дакументаў за $350, - распавядае Барыс.

Відаць, што менскі заводчык любіць сваіх гадаванцаў. Барыс з гонарам кажа, што не баіцца пакідаць трохгадовага сына ў ложачку з велізарным мэйн-кунам: кот ніколі не прычыніць шкоды, такі ён. Мяркуючы па ўсім, чалавек ,які паспеў у свой час абляцець усё замежжа на савецкім Ту-134, разбіраецца ў жыцці. І ў адданых прыгажунах - мэйн-кунах.