Затрыманыя на антыпуцінскай акцыі беларусы вызваленыя

Актывісты грамадзянскай кампаніі «Джынс – за Свабоду», затрыманыя ўчора падчас акцый «Пуцін, Go Home!», былі вызваленыя. У РУУС Маскоўскага раёна актывісты правялі больш за 3 гадзіны. На ўсіх, у тым ліку, і на непаўналетніх, былі складзеныя пратаколы. Кожнага сфатаграфавалі і ўзялі адпячаткі пальцаў.

У РУУС маладых людзей трымалі ў актавай зале, дзе ўсе тры гадзіны не дазвалялі сядзець. У дачыненні затрыманых склалі пратаколы па артыкуле «ўдзел у несанкцыянаваным мерапрыемстве». У 21.30 маладых людзей паступова пачалі выпускаць на свабоду.

Супрацоўнікі міліцыі папярэдзілі актывістаў, што пазней усе яны атрымаюць позвы ў суд.