Улады масава парушаюць Канстытуцыю

Улады забараняюць грамадзянам пратэставаць супраць адмены льгот. Заяўнікі пікетаў, правядзенне якіх прызначанае на 16 снежня, атрымліваюць адмовы пад рознымі чыннікамі.

Сайт www.ucpb.org адзначае, што калі раней адказы, атрыманыя заяўнікамі з розных органаў улады, пісаліся літаральна пад капірку, то гэтым разам службоўцы падышлі да працэсу «крэатыўна». Так заяўніку акцыі Г. Нахімовічу, які пражывае па вуліцы Любімава ў Менску, адмовілі на той падставе, што двор яго дому «не належыць да ліку аб'ектаў або будынкаў, размешчаных у межах горада Менска».

Сябру Палітрады АГП Валянціне Палевіковай адмовілі на той падставе, што дом, размешчаны на вуліцы Лесі Украінкі, у двары якога і быў заяўлены пікет, знаходзіцца на тэрыторыі засакрэчанага вайсковага аб'екта. Інакш як разумець фразу за подпісам намесніка старшыні Мінгарвыканкама Ціцянкова: «правядзенне масавых мерапрыемстваў не дапускаецца на адлегласці менш як 50 метраў ад тэрыторый арганізацый, якія забяспечваюць абароназдольнасць, бяспеку дзяржавы і жыццядзейнасць насельніцтва». Валянціна Палевікова ўдакладняе, што ў двары дома ёсць толькі адзін «стратэгічны аб'ект» – гімназія, у якой вучыцца ўнучка Лукашэнкі.

Актывістцы «Маладых дэмакратаў» Наталлі Дзядок адмовілі без тлумачэння прычын. А актывісту «Маладых дэмакратаў» Віталію Стажараву ў адказ на заяву аб правядзенні пікету з Менгарвыканкама прыйшоў… пусты канверт.

Але найбольш моцнае пачуццё гумару прадэманстраваў старшыня выканкама в. Лугавая Слабада А.М.Сянчук. Ён, спасылаючыся на арт.6 закона Рэспублікі Беларусь «Аб масавых мерапрыемствах» адмовіў у правядзенні пікетаў грамадзяніну С.С Пачыкоўскаму «ў сувязі з неспрыяльнымі пагоднымі ўмовамі»