Рыгору Барадуліну споўнілася 74 гады

Сёньня адзначае Дзень нараджэньня народны паэт Беларусі Рыгор Барадулін.

Рыгор Барадулін нарадзіўся 24 лютага 1935 году на Ўшаччыне. Скончыў філялягічны факультэт Беларускага дзяржаўнага ўнівэрсытэту, нагадвае «Радыё Свабода».

Аўтар дзесяткаў паэтычных і літаратурна-крытычных кніг, сярод якіх зборнікі паэзіі «Маладзік над стэпам», «Неруш», «Вечальле», «Амплітуда сьмеласьці», «Самота паломніцтва», «Эваньгельле ад мамы». У 2000 годзе выдаў зборнік вершаў «Лісты ў Хэльсынкі» з малюнкамі Васіля Быкава, а ў 2003 годзе разам выйшаў сумесны з Васілём Быкавым зборнік «Калі рукаюцца душы». У 2005 годзе ў сэрыі «Бібліятэка Свабоды. ХХІ стагодзьдзе» пабачыў сьвет збор показак, эпіграмаў і эсэ «Дуліна ад Барадуліна».

Апошняя кніга Барадуліна – ягонае ліставаньне з Васілём Быкавым «Дажыць да зялёнай травы...» – пабачыла сьвет у мінулым годзе.

«Паэзія Барадуліна – чыстай красы Боская паэзія беларусаў, крыніца нацыянальнага натхненьня, складнік яе спрадвечнага духоўнага набытку. Тое асабліва адчувальна, калі апынуцца ў растаньні зь ею...» – пісаў Васіль Быкаў, які называў Рыгора Барадуліна сваім найбліжэйшым сябрам. Блізкае сяброўства зьвязвала Барадуліна і з Уладзімерам Караткевічам.

З 1988 году Рыгор Барадулин зьяўляецца членам Аргкамітэту, а затым - Сойму Беларускага народнага фронту. Сябра Беларускага ПЭН-цэнтру.