Чыноўнікаў выканкамаў прымушаюць касіць авёс

Супрацоўнікі Берасцейскага аблвыканкама ўзялі косы і адправіліся на палі, дзе ідзе бітва за ўраджай.

Зрабілі яны гэта «добраахвотна». Як паведамляе газета «Рэспублiка», некаторыя прыхапілі з сабой уласныя косы.

У СВК «Кутузаўскі» Кобрынскага раёна «дэсант» упраўлеўнцаў-касцоў высадзіўся раніцай на аўсяным полі, на якім выкарыстанне камбайна з-за цяжкага стану падмочаных пасеваў было прызнана эканамічна немэтазгодным, паведамляе «Ежедневник».

Паўсотні «добраахвотнікаў» з аблвыканкама да чатырох гадзін дня амаль без перапынкаў ішлі роўнымі шэрагамі па палеглых хлябах. У ліку лідэраў аказаўся кіраўнік справамі аблвыканкама Антон Стэльмах.

«Усе разам дзякуючы спаборніцкаму працоўнаму запалу скасілі авёс на плошчы каля пяці гектараў, занеслі свой уклад у агульны ўраджай і арганізацыйным словам, і ўмелымі рукамі», -- паведамляе «Рэспублiка».

Нагадаем, што на мінулым тыдні прыклад таго, як дапамагчы прыбраць ураджай, паказаў Аляксандр Лукашэнка, які павёз паказваць правілы касьбы расейскаму аглядальніку Міхасю Гусману.