Беларускі дыктатар: «Бізнэсмэны вітаюць парадак і не любяць псэўдадэмакратыю»

Лукашэнка лічыць, што замежнікам павінна быць камфортна супрацоўнічаць з Беларуссю, «нягледзячы на дыктатуру».

7 верасня беларускі кіраўнік сустрэўся з міністрам замежных спраў Славакіі Міраславам Лайчаком.

«Нам важна мець з вамі цеснае супрацоўніцтва. Пры гэтым мы не ставім ніякіх умоў, - цытуе Аляксандра Лукашэнку БелТА. - Галоўнае, каб вы ў канкурэнтнай барацьбе знайшлі сваё месца, а ніш для супрацоўніцтва ў нас дастаткова».

На яго думку, у Беларусі ёсць добрая прывілея: «Каштоўна, што мы стварылі добрую канкурэнцыю ў сферы інвестыцый. Я не буду казаць пра прывабнасць, заклікаць вас да чаго-небудзь. Бізнэсмэны добра ведаюць клімат». А з 1 студзеня 2010 года, калі «будзе створаны магутны эканамічны трыумвірат у выглядзе Мытнага звяза», працаваць з Беларуссю будзе яшчэ выгодней, адзначыў ён.

Адной з перавагаў краіны Аляксандр Лукашэнка назваў таксама «прыстойнае стаўленне» да інвестараў і ў цэлым бізнэсмэнаў, выкананне ўсіх узятых на сябе абавязкаў. «Калі мы дамовіліся, то мы свята выконваем дамоўленасці. У нас у гэтым плане ідэальны парадак – тое, што ў некаторых дзяржавах называюць дыктатурай. Бізнэсмэны вітаюць, што тут ёсць парадак: сказана – будзе зроблена. Яны не любяць рознага роду псэўдадэмакратыю», - сказаў кіраўнік.

Сёння ў Беларусі актыўна працуюць прадстаўнікі дзелавых колаў многіх краін. «Ёсць фактары, якія сведчаць, што тут працаваць можна», - падкрэсліў Лукашэнка.

Міністр замежных спраў Славакіі ў сваю чаргу адзначыў, што адной з мэт яго візіту з'яўляецца абмеркаванне адносін паміж ЕЗ і Беларуссю. Паводле яго слоў, Славакія імкнецца актыўна ўплываць на фармаванне пазіцыі ЕЗ у адносінах да Беларусі. Міраслаў Лайчак таксама з задавальненнем адзначыў той факт, што Беларусь стала паўнапраўным сябрам «Усходняга партнёрства», якое адчыняе добрыя магчымасці для двухбаковай інтэграцыі. Сёння важна напаўняць гэтую праграму канкрэтным зместам, дадаў ён.