«Бабруйскі кур'ер» на мяжы банкруцтва

Рэдактар Анатоль Санаценка лічыць, што выданне апынулася ў такой сітуацыі з-за ціску ўладаў.

Найстарэйшая ў Бабруйску недзяржаўная газета «Бабруйскі кур'ер» знаходзіцца на мяжы банкруцтва. Супрацоўнікі рэдакцыі знаходзяцца ў вымушаным адпачынку. Рэдактар Анатоль Санаценка лічыць, што выданне апынулася ў такой сітуацыі з-за ціску ўладаў, паведамляе «Радыё Свабода».

Да гэтага часу існуе забарона на размяшчэнне рэкламы ў «Бабруйскі кур'ер». Амаль на кожным пасяджэнні ідэалагічнай вертыкалі назву газеты вымаўляюць як заклён, заяўляе Анатоль Санаценка.

«Апошнія сем гадоў улады рабілі ўсё, каб эканамічна задушыць «Бабруйскі кур'ер». У выніку за гэтыя гады газета не змагла зарабіць столькі сродкаў, колькі за гэты ж перыяд нашыя бліжэйшыя канкурэнты. Перспектывы для газеты пакуль не вельмі зразумелыя. Можа быць, нашыя крокі па выхаду са склаўшайся сітуацыі і прывядуць да чаго-небудзь, аднак пакуль пра гэта цяжка казаць», - паведаміў Анатоль Санаценка.

Доўгі час беларуская пошта адмаўлялася браць «Бабруйскі кур'ер» у сваю сетку распаўсюду. Для газеты былі недаступныя шапікі «Белсаюздруку».

«Мы знаходзімся ў даволі спецыфічным асяроддзі. У Бабруйску найбольшая колькасць газет пасля Менска. Спецыфіка заключаецца ў тым, што ўлады лічаць усе газеты сваімі служкамі. Так лічыць ідэалагічная вертыкаль. Напрыклад, на Дзень друку ўсе кіраўнікі мясцовых газет, акрамя двух, былі запрошаныя ў гарвыканкам і атрымалі дыпломы і грашовыя прэміі. Нам шмат разоў даводзілася чуць, што мы не пра тое пішам. Не трэба было пісаць пра тое і пра тое. Так, мы страцілі грошы, аднак захавалі свае жыццёвыя каштоўнасці, што важней за грошы. Мы, як і раней, лічым, што прафесія журналіста - гэта не прафесія лёкая», - падкрэсліў Анатоль Санаценка.