Эксперт: Да канца года даляр можа каштаваць больш за 11 тысяч рублёў

Што адбылося? Каму і якім чынам «прыйдзецца працаваць, каб даляр не абваліўся», пра што пасля першых дадсесій БВФБ заяўляў галоўны эканаміст і наогул галоўны па краіне?

Сітуацыю каментуе Euramost.org кіраўнік Аналітычнага цэнтра «Стратэгія» эканаміст Леанід Заіка.

- Мне даводзілася папярэджваць і мірнае насельніцтва краіны, і ўрад, што 28-адсоткавае павышэнне тарыфнай стаўкі першага разраду азначае павелічэнне грашовай масы толькі без каэфіцыента мультыплікацыі на гэтую ж велічыню. Гэта значыць, практычна на 30% будзе дэвальваваны і беларускі рубель. Таму ўсё ідзе так, як павінна ісці. Няма чаго было адкрываць рот і казаць пра тое, што будзе праводзіцца індэксацыя. Плюс 500 тысяч рублёў пенсіянерам «на бульбу» - гэта 210 мільёнаў даляраў, з попытам на якія могуць выступіць людзі. Таму што б ні рабіў Нацыянальны банк, ён не ў стане перашкаджаць папулісцкім рухам кіраўнікоў краіны. Калі нехта ў Зімбабвэ, Сьера-Леонэ або ЗША заявіць, што на 30% вырасце стаўка першага разраду заработнай платы, то гэта будзе значаць шлях да інфляцыі і абясцэньвання нацыянальных грошай.

- Чаго варта чакаць да канца года ў дачыненні да курсу рубля да даляра?

- Да канца года трэба, па-першае, правесці псіхалагічную экспертызу ўрада, і другую экспертызу - па іхніх прафесійных ведах. А ўвогуле, лічыце: калі без мультыплікацыі даляр скокне на 30% - гэта 10 тысяч рублёў. Пры захаванні гэтых трэндаў кошт даляра можа дасягнуць 11 тысяч рублёў.

- Які Ваш прагноз наконт гадавой інфляцыі? Нават некаторыя афіцыйныя эксперты запэўніваюць, што ўзровень інфляцыі нельга ўтрымаць у межах 100%.

- Я яшчэ ў маі-чэрвені казаў, што гадавая інфляцыя будзе большай за сто адсоткаў. Так што гэта цалкам рэальна. Можаце нават не хвалявацца.