МВФ: З Беларуссю размаўляць пакуль няма аб чым
77- 17.10.2011, 11:26
Міжнародны валютны фонд чакае ад Аляксандра Лукашэнкі пацверджання жорсткай макраэканамічнай палітыкі на 2012 год.
Пра гэта заявіў у панядзелак на брыфінгу ў Менску кіраўнік місіі МВФ па Беларусі Крыс Джарвіс.
«Мы хочам паглядзець на прагноз макраэканамічнай палітыкі на 2012 год і мы хочам убачыць, ці будуць гэтыя рэкамендацыі (па ўзмацненні жорсткасці макраэканамічнай палітыкі - ІФ) падтрыманыя прэзідэнтам», - сказаў К. Джарвіс.
Адказваючы на пытанне аб неабходнасці вызвалення ўсіх палітычных зняволеных у Беларусі, ён таксама падкрэсліў, што «МВФ не ставіць палітычных умоваў. Аднак К. Джарвіс адзначыў, што перш, чым абмяркоўваць праграму супрацоўніцтва з Фондам, «трэба праверыць, ці гатовыя выканаўчыя дырэктары падтрымаць яе». Ён нагадаў, што ў Савеце выканаўчых дырэктараў МВФ прысутнічаюць прадстаўнікі больш чым 180 краін.
Пры гэтым, «у ходзе перамоваў мы засяродзілі ўвагу выключна на эканамічных пытаннях», - яшчэ раз падкрэсліў К. Джарвіс.
Па ягоных словах, магчымая сума фінансавання з боку МВФ, на дадзеным этапе дыялогу з беларускімі ўладамі, яшчэ не стала прадметам перамоваў. «Мы не падышлі да этапу абмеркавання канкрэтных сум, і будзем разглядаць гэтае пытанне ў межах наступнай місіі, калі яна адбудзецца», - сказаў К. Джарвіс, каментуючы зробленую нядаўна заяву міністра фінансаў Беларусі Андрэя Харкаўца аб тым, што перамоўная місія фонду будзе працаваць у Менску ў снежні гэтага года.
Каментуючы вынікі місіі, якая працавала ў Менску 5-17 кастрычніка, К. Джарвіс адзначыў, што «ў нас адбыліся вельмі карысныя дыскусіі, і мы іх завяршаем з большай упэўненасцю, чым гэта было ў пачатку перамоваў». Ён падкрэсліў, што «планы ўрада і Нацбанка на наступны год арыентаваныя ў правільным напрамку».
К. Джарвіс яшчэ раз падкрэсліў, што перш, чым прыступіць да прадметных перамоваў аб вылучэнні фінансавання, у якасці першага кроку МВФ чакае ад уладаў Беларусі «цвёрдасці на самым вышэйшым узроўні па забеспячэнні стабільнасці і правядзенні рэформаў».