Юрысты і праграмісты ЖКГ здаюць бутэлькі і рыззё

Цяпер пустыя бутэлькі, рыззё і паперы збіраюць усе супрацоўнікі ЖКГ.

Такая стараннасць тлумачыцца тым, што за год кожны райцэнтр павінен сабраць некалькі соцень тон другаснай сыравіны. Без энтузіязму тут відавочна не абыйсціся, піша «Камсамольская праўда ў Беларусі».

- Мы ўжо перавыканалі план за мінулы год! Сабралі макулатуру, рыззё, шклотару, металалом. Адзінае, недацягнулі па пластыкавых бутэльках - некалькі тон не набралося, - кажа дырэктар КУМПП ЖКГ «Ляхавіцкая ЖКГ» Аляксандр Мядвецкі.- Заданне ж сабраць другсыравіну ў мяне даводзіцца кожнаму працаўніку: і галоўнаму бухгалтару, і інжынеру, і праграмісту. За год кожнаму ставіцца план сабраць 90 кг макулатуры і 50 кг рыззя. Сабраць столькі другаснай сыравіны цалкам рэальна! У мінулым годзе я сам асабіста здаў каля 700 кг рыззя і больш за 200 кг пластыкавых бутэлек.

- Адкуль жа вы ўзялі столькі?

- Старыя непатрэбныя анучы мне аддалі бацькі. На дапамогу прыйшлі і іншыя пенсіянеры. Для макулатуры спатрэбіліся скрынкі ад бытавой тэхнікі, знайшліся старыя школьныя сшыткі дзяцей. Словам, рэсурсаў дастаткова!

- А тыя, хто не выконвае план, панясуць пакаранне?

- Не, вядома. Але кожны ставіцца адказна да гэтага. Той аддзел, які выконвае план, заахвочваецца. Гэта можа быць і прэмія, і матэрыяльная дапамога пры выхадзе ў адпачынак.

- Міністэрства ставіць задачу перад ЖКГ сабраць пэўную колькасць тон другаснай сыравіны. А аблвыканкамы і гарвыканкамы вызначаюць арганізацыі, якія адказваюць за збор. Прыцягваюць ж да здачы другаснай сыравіны супрацоўнікаў адміністрацыі ЖКГ па ініцыятыве саміх дырэктараў, - кажа «КП» начальнік упраўлення камунальнай гаспадаркі і энергетыкі Міністэрства ЖКГ Вячаслаў Шміт.- Дарэчы, у нашым міністэрстве таксама ёсць загад па зборы макулатуры. Ёсць людзі, якія за гэта адказваюць. Зараз абмяркоўваецца пытанне аб заахвочванні аддзелаў, якія больш за ўсё сабралі паперы.