У справе аб «чупакабры» з'явіліся першыя падазраваныя

У загадкавых забойствах хатніх жывёл у Старобіне падазраюць бадзяжных сабак і драпежных жывёл.

Пра гэта карэспандэнту БелТА паведаміў намеснік начальніка РАУС Салігорскага раёна Віталь Сіротка.

Паводле яго слоў, мясцовы жыхар бачыў, як бяздомны сабака выбягаў з аднаго з падворкаў пасёлка, пасля чаго там былі выяўленыя тушы забітых птушак. Для выключэння гэтай версіі ў населеным пункце пачалі адлоўліваць бяздомных сабак.

Таксама разглядаецца і іншая прычына гібелі хатніх жывёл, якія могуць быць лёгкай здабычай для драпежных звяроў. Па-ранейшаму застаецца загадкай спосаб расправы з жыўнасцю: тушы са слядамі ўкусаў застаюцца некранутымі. Ахвярамі невядомага звера становяцца куры, гусі, качкі, трусы.

«Для аналізу акалічнасцей прыцягнуты прыродаахоўныя ведамствы, вывучаюцца следавыя карціны. Штодня ўчастковыя міліцыянты абыходзяць падворкі. Дапамагаюць таксама паляўнічыя і ляснічыя», - сказаў суразмоўца.

Намеснік начальніка РАУС лічыць, што начное дзяжурства не прынясе ніякіх вынікаў. «Істота, якая забівае хатніх птушак, паводзіць сябе вельмі асцярожна і адчувае набліжэнне людзей, а святло ліхтароў яе адпуджвае», - адзначыў ён.

У РАУС Салігорскага раёна ў апошні час перасталі паступаць трывожныя звароты жыхароў пасёлка, звязаныя з забойствамі хатніх жывёл. «Гэта, магчыма, не сведчыць аб спыненні нападзенняў невядомай жывёлы. Бо, як правіла, жыхары спрабуюць абараніць сваю жыўнасць самастойна, ставяць пасткі», - падкрэсліў Віталь Сіротка. Пагрозы для здароўя і жыцця жыхароў Старобіна не існуе, дадаў ён.