Ісламісты патрабуюць разбурыць егіпецкія піраміды

Адзін з лідараў егіпецкіх ісламістаў Мурган Салем аль-Гахары заклікаў разбурыць «ідалы» – піраміды і Сфінкса.

Пра гэта паведамляе ИТАР-ТАСС са спасылкай на тэлеканал Al-Arabia.

«Бог загадаў Мухамеду знішчыць ідалаў. Мы павінны зрабіць гэта з усімі помнікамі, якія апанавалі Егіпет. Талібы ў Афганістане зрабілі тое, што даўно павінен быў зрабіць урад: яны разбурылі статуі Буды», – заявіў Мурган Салем аль-Гахары.

Асуджаны былым прэзідэнтам Хосні Мубаракам ісламіст аль-Гахары і яго паслядоўнікі неаднаразова заклікалі знішчыць усе старажытнаегіпецкія помнікі, якія нагадваюць ім пра ідалапаклонства.

Калі да ўлады ў Егіпце прыйшоў прадстаўнік «Братоў-мусульман» Мухамед Мурсі, шмат хто асцерагаўся, што ён паслухаецца іх парад. Аднак Мурсі, які называе сябе «прэзідэнтам усіх егіпцян», не змяніў культурную палітыку.