«Белавія» можа сарваць дамоўленасці з Масквой?
4- 27.04.2012, 17:40
Нацыянальная авіякампанія «Белавія» па-ранейшаму вывучае мэтазгоднасць адкрыцця яшчэ аднаго рэйса ў паведамленні Менск-Масква.
Аб гэтым паведамілі агенцтву «Інтэрфакс-Захад» у прэс-службе авіякампаніі.
«У цяперашні час вядзецца аналіз загрузкі рэйсаў, вывучаецца, наколькі мэтазгоднае адкрыццё пятага (на дзень - ІФ) рэйса», - адзначылі там.
У прэс-службе звярнулі ўвагу, што «ў адпаведнасці з дасягнутымі дамоўленасцямі авіякампаніі прадастаўляецца права ўвесці пятую частату, але рашэнне застаецца за кампаніяй».
9 красавіка Беларусь і Расея дамовіліся, што беларускія і расейскія аіяперавозчыкі будуць выконваць у летні перыяд па 5 рэйсаў на дзень ў паведамленні Менск-Масква. З 27 красавіка «Белавія» можа ўвесці дадатковы, пяты рэйс. У верасні бакі плануюць правесці кансультацыі і вызначыць умовы палётаў на зімовы перыяд. Пры гэтым бакі пагадзіліся абмеркаваць лібералізацыю рынку авіяперавозак.
26 сакавіка з-за рознагалоссяў аб колькасці рэйсаў на час былі прыпыненыя авіязносіны паміж Менскам і Масквой.