Чыноўнік аб забароне на «чарніла»: Давайце забаронім і «Кока-Колу»

У Беларусі працягваецца няроўны бой з алкагольным змеем.

Міліцыя і медыкі прапаноўваюць новыя ініцыятывы, гандаль, цяжка ўздыхаючы, ідзе на саступкі.

А ці ёсць эфект ад забаронных мер? У Партызанскім раёне Менска з пачатку лета ідзе эксперымент па часовай забароне продажу мацаваных пладова-ягадных він і пладовых вінных напояў. У першага намесніка кіраўніка адміністрацыі Пятра Шпакоўскага onliner.by спытаў аб першых выніках і далейшых антыалкагольных планах.

- Тут ёсць нюансы. Партызанскі - гэта адзін з дзевяці раёнаў Менска. А горад - адзінае цэлае. Калі ў нас будзе пастаянная забарона на продаж віна, могуць узнікнуць юрыдычныя пытанні, - адзначыў ён. - Мінюст ужо запытваў нашы рашэнні, будзе даваць прававую ацэнку. Вынікі? На думку міліцыі, абстаноўка стала лепш трохі. Але ж мы жывем у горадзе. Напрыклад, работнікі трактарнага завода выйшлі з працы, паглядзелі, што не прадаецца, і паехалі да сябе ў Серабранку або ў Фрунзенскі раён, там купяць, што трэба. Усё вельмі няпроста.

- Дык можа, варта ўвесці забарону ў цэлым па горадзе?

- Мэр горада казаў: скончыцца эксперымент, паглядзім, наколькі неабходна прымаць такія рашэнні на ўзроўні горада. Пытанне не простае: што рабіць тады вытворцам? Там таксама нашы грамадзяне працуюць, магутнасці нейкія ёсць. Калі мы забараняем, то прадпрыемствы зачыняць трэба. Трэба і такую сітуацыю прачуць: у гарбачоўскія часы, памятаеце, змагаліся з алкагалізмам. І тады пачалі ўжываць іншае, вадкасці розныя. Такога нельга дапусціць.

Намеснік кіраўніка адміністрацыі задаецца пытаннем: калі пладова-ягадныя віны на самай справе шкодныя, то чаму ў нас іх дазваляюць вырабляць?

- Можна і нашу гарэлку беларускую забараніць, сказаць, што толькі імпартная добрая. Павінна быць, напэўна, нейкае заключэнне Міністэрства аховы здароўя, на падставе якога можна ўвесці забарону. А так гэта нагадвае дыскусію аб тым, што «Кока-Кола» або «Пепсі-Кола» - атрута. Але людзі ва ўсім свеце яе п'юць, ніхто ім не забараняе.

- Гандаль у раёне церпіць страты?

- Некаторыя кіраўнікі гандлёвых аб'ектаў кажуць, што ў іх сур'ёзна знізіўся тавараабарот. А ў крамах таксама супрацоўнікі працуюць, хочуць годную зарплату атрымліваць. Таму фінансавае становішча гандлёвых аб'ектаў трэба ўлічваць пры такіх рашэннях.

Пётр Шпакоўскі падзяліўся сваім чалавечым, а не чыноўніцкім бачаннем праблемы.

- У Стакгольме, я чытаў у газеце, ёсць піцейная ўстанова на 3000 месцаў. Там ахова, турысты туды прыходзяць пасядзець. А колькі ў нас такіх аб'ектаў? Куды пайсці брыгадзе токараў-фрэзероўшчыкаў пасля працы? Усюды дорага. У нас усё гэта таксама павінна з'яўляцца, каб гаварыць пра нейкую культуру піцця.