З менскай школы за лета звольніліся 30 настаўнікаў

Са сталічнай школы № 132 за чэрвень-жнівень звольнілася больш за 30 выкладчыкаў, і дзяцей няма каму вучыць.

Пра гэта прэс-службе «Гавары праўду» на ўмовах ананімнасці паведаміў адзін з бацькоў вучняў.

Паводле яго слоў, настаўнікі бягуць ад неўласцівых ім абавязкаў: забяспечваць стоадсоткавае харчаванне ў школе, навязванне платных гурткоў, наведвальнасць музеяў (па пяць разоў у адзін і той жа) і спартыўных мерапрыемстваў.

Адміністрацыя школы дадзеных аб масавых звальненнях не пацвярджае.

«Навошта вам такая інфармацыя аб нашай школе? Гэтая інфармацыя наогул канфідэнцыйная! Да пабачэння», - заявілі там.

Аднак самі настаўнікі сведчаць: у школе пануе невыносная псіхалагічная атмасфера. Напрыклад, адна з былых супрацоўніц школы, якая пажадала не называць свайго імя, звольнілася адтуль нядаўна, калі скончыўся кантракт.

«Але пайшла я з працы не толькі таму. Любы чалавек, хто з гэтай школы сышоў, вам скажа, што ўмовы там невыносныя. Застаюцца толькі пенсіянеры і тыя, хто павінен адпрацаваць размеркаванне. З педкалектыву ў 50 чалавек тут працуе 12 пенсіянераў. Ні ў якой іншай школе столькі пенсіянераў няма! А астатнія кожны год сыходзяць. Чалавек па 30, не менш. Праўда, зараз нам сказалі, што настаўнікі на новы навучальны год цалкам набраныя», - кажа настаўніца.

Па словах педагога, з такімі праблемамі яна ўпершыню сутыкнулася толькі ў школе № 132. «Я ж у многіх школах працавала, а тут... Перад Новым годам сышла завуч па выхаваўчай працы - хоць не прайшло і паўгода, як уладкавалася. Цяпер летам сышла завуч па вучэбнай частцы. Загадчыца біблятэкай сышла, прапрацаваўшы два месяцы. Цякучка там страшная», - распавядае выкладчык.

Адток кадраў яна тлумачыць недарэчнымі паводзінамі дырэктара.

«Я лічу, гэтаму чалавеку нельга працаваць ні з дзецьмі, ні з педагогамі. Што б ты ні зрабіў, яна заўсёды скажа: «Дрэнна!» Гэта чалавек настрою. Увесь стан школы залежыць ад таго, з якім настроем прыйшла дырэктар. У нас калі заходзяць у школу, пытаюцца ў вахцёра: «Які ў яе настрой?» І калі ён дрэнны, усе баяцца трапляцца дырэктару на вочы. За год я пяць разоў была на бальнічным, усё гэта з-за нерваў. І не адна я, многія так», - працягвае настаўнік.

Яна скардзіцца на тое, што дырэктарка пастаянна прыніжае педкалектыў «Уявіце сабе: настаўнікі абедаюць у сталовай, за звычайным сталом, дзе сядзяць і дзеці, і педагогі. Праходзіць дырэктар і кажа: «Куды вы селі? Гэта ж стол дырэктара!» І нам, настаўнікам вышэйшай катэгорыі, прыйшлося падняцца і перанесці талеркі, каб саступіць ёй месца», - узгадвае былая супрацоўніца школы.

Ёсць і больш сур'ёзныя сітуацыі. «Каб элементарна падпісаць якую-небудзь паперку ці папрасіць адгул, трэба прайсці цэлую экзэкуцыю. Калі я прыйшла да дырэктара, каб узяць даведку пра стаж і катэгорыі для працы ў летнім лагеры, яна не хацела даваць. А аднойчы мне патрэбна была даведка, якую робіць спецыяліст па ахове працы. Калі гэты чалавек напісаў даведку з характарыстыкай месца працы і падышоў да дырэктара за подпісам, яна не падпісала. Я прыйшла - яна мяне выгнала са словамі «Не падпішу табе гэтую даведку!» Так і сказала, на «ты». Яшчэ адну даведку дырэктар падпісала са скандалам, толькі калі я папярэдзіла, што іду ў РАНА», - дадала выкладчык.

Бывае, дырэктар просіць настаўнікаў аб звышурочнай працы, абяцаючы за гэта адгул. Але потым сваіх абяцанняў не выконвае.

«Настаўнік дзень працуе, а вечарам яму кажуць - трэба пасля працы звазіць дзяцей на такое-та мерапрыемства. За гэта абяцаюць адгул, прэмію ці яшчэ нешта. Настаўнік як дурань да шасці вечара сядзіць на працы, потым завозіць дзяцей на хакей ці ў музей, прывозіць назад, у 11-й гадзіне ночы дабіраецца дадому... У маім выпадку, калі я прыйшла ўзяць адгул за дадатковае мерапрыемства, мне сказалі: «А гэта ваша праца», - кажа настаўнік.

«Потым яшчэ такі выпадак быў, калі я рыхтавала мерапрыемства на горад. Вы ж разумееце, колькі гэта працы, колькі рэпетыцый з дзецьмі - у школе трэба было знаходзіцца па 12-13 гадзін! Мерапрыемства прайшло, усе задаволеныя. Але калі я за гэта папрасіла перад Новым годам узяць адгулы, на 30 і 31-е, мне было адмоўлена», - дадала яна.