Беларуская нафтавая кампанія хоча купіць АЗС ва Украіне

ЗАТ «Беларуская нафтавая кампанія» хоча купіць аўтазаправачныя станцыі ва Украіне, паведаміў намеснік генеральнага дырэктара БНК Аляксандр Дзямідаў.

«Мы плануем як мінімум застацца на тых жа пазіцыях (на ўкраінскім рынку). Асноўныя намаганні будуць накіраваны на паляпшэнне эфектыўнасці работы», - адзначыў намеснік дырэктара.

Паводле яго слоў, гаворка ідзе аб магчымай куплі або арэндзе аўтазаправачных станцый - ад некалькіх штук да некалькіх дзесяткаў. Акрамя таго, плануецца размяшчэнне нафтабаз па тых рэгіёнах, дзе беларускія нафтапрадукты найбольш запатрабаваныя, паведамляе БелТА.

Пастаўкі ва Украіну складаюць 15% у агульным аб'ёме экспарту БНК, у першым паўгоддзі 2012 года туды пастаўлена 840 тыс. т. нафтапрадуктаў.

Прадстаўнік БНК таксама распавёў аб планах кампаніі ў бліжэйшы час стварыць даччынае падраздзяленне ў Смаленску. Паводле яго слоў, гэта дасць магчымасць павысіць эфектыўнасць паставак нафтапрадуктаў у прымежныя раёны РФ.

Як паведамлялася, урад Украіны прыняў рашэнне аб пачатку расследавання ў дачыненні да імпарту беларускіх нафтапрадуктаў. Увядзенне пошлін лабіруюць украінскія нафтаперапрацоўчыя заводы, па меркаванні якіх імпартуемыя з Беларусі нафтапрадукты паступаюць ва Украіну па заніжаных коштах з-за льготнай расейскай пошліны для краін Мытнага саюза.