Затрыманы адзін з кіраўнікоў Гомельскага домабудаўнічага камбіната

КДБ падазрае яго ў атрыманні хабару.

«Кіраўнік структурнага падраздзялення Гомельскага домабудаўнічага камбіната затрыманы, у дачыненні да яго ўзбуджаная крымінальная справа па арт. 430 «Атрыманне хабару», перадае «Інтэрфакс» са спасылкай на абласное УКДБ.

«Падставай для ўзбуджэння крымінальнай справы паслужылі матэрыялы, атрыманыя ў ходзе правядзення аператыўна-вышуковых мерапрыемстваў, накіраваных на выяўленне і спыненне злачынстваў карупцыйнай накіраванасці ў будаўнічай галіне», адзначылі ва УКДБ.

«Службовая асоба, у абавязкі якой уваходзіла кіраўніцтва вытворча-гаспадарчай дзейнасцю падраздзялення, а таксама кантроль і каардынацыя дзейнасці падпарадкаваных работнікаў, затрымана пасля атрымання незаконнага грашовага ўзнагароджання ад прадстаўніка камерцыйнай структуры, які працуе ў сферы будаўніцтва», адзначылі ва ўпраўленні.

«Хабар прызначаўся за станоўчае вырашэнне пытання аб магчымасці выканання работнікамі дзяржаўнай арганізацыі будаўнічых работ на аб'ектах камерцыйнай структуры», паведамілі ва УКДБ.

«У цяперашні час праводзяцца следчыя дзеянні», адзначылі ва ўпраўленні.