Праваабаронца дамогся кампенсацыі за 2 гады турмы

Андрэй Бандарэнка атрымае ў якасці кампенсацыі за амаль 2 гады, праведзеныя ў турме, 100 мільёнаў рублёў.

Праваабаронца распавёў «Салідарнасці» пра падрабязнасці цяжбы.

- Зыходзячы з беларускага заканадаўства, я ніколі не сумняваўся ў тым, што мне выплацяць кампенсацыю, - адзначыў Андрэй Бандарэнка. - Як толькі мяне прызналі невінаватым, пытанне было ў тым, калі і колькі. Суд пастанавіў, што кампенсацыю за час, праведзены ў месцах пазбаўлення волі, абавязана выплаціць Міністэрства фінансаў. Тое, у сваю чаргу, усімі праўдамі і няпраўдамі спрабавала даказаць адваротнае.

Па словах юрыста, ад цяжбы застаўся непрыемны асадак.

- Наша дзяржава не дае грамадзяніну шанцу адчуць сябе абароненым, - упэўнены суразмоўца. - Маральную шкоду немагчыма памацаць, яе цяжка ацаніць, але калі дзяржава заклапочаная тым, наколькі высіліцца казна ў выніку выплаты, а не кампенсацыяй нанесенай грамадзяніну шкоды, становіцца агідна.

Андрэй Бандарэнка гатовы адмовіцца ад усёй сумы кампенсацыі.

- Каб зразумець маё стаўленне да гэтай кампенсацыі, я згодны адмовіцца ад грошай пры ўмове, што адзін з суддзяў правядзе 2 гады ў турме, - кажа лідэр «Платформы». - Кампенсавання прыйшлося чакаць прыкладна столькі ж, колькі і сядзець у турме - каля двух гадоў. І ў гэтым я таксама бачу своеасаблівы цынізм нашай сістэмы.

На думку праваабаронцы, грамадзянская супольнасць павінна ўсведамляць патрэбу ў самастойнай абароне сваіх інтарэсаў.

- Калі пракуратура, КДБ, МУС і астатнія дзяржорганы не даюць такой абароны, грамадзянская супольнасць павінна ўсвядоміць неабходнасць абараняць сябе самастойна, - упэўнены суразмоўца. - Для гэтых мэтаў і стваралася «Платформа», каб дапамагаць звычайным людзям, якія становяцца ахвярамі рэжыму і сістэмы і не з'яўляюцца пры гэтым палітвязнямі.

Андрэй Бандарэнка не задумваўся, на што будзе выдаткаваная кампенсацыя.

- У мяне некалькі грэблівае стаўленне да гэтых грошай з-за таго, колькі часу пайшло на яе адстойванне. Ды і выглядае гэтая кампенсацыя як кінутая костка: «абы адчапіўся». Таму, пра тое, як я буду  гэтыя грошы, пакуль не думаў, - падагульніў суразмоўца.