Лукашэнка: Я ж не буду гойсаць на прасторах усёй краіны і працаваць за вас

Дыктатар зноў прызначыў крайнімі за правалы ў эканоміцы чальцоў урада.

Лукашэнка запатрабаваў выканання ў поўным аб'ёме Дзяржпраграмы сацыяльна-эканамічнага развіцця і комплекснага выкарыстання прыродных рэсурсаў Прыпяцкага Палесся, разлічанай на 2010-2015 гады. Аб гэтым ён заявіў учора падчас рабочай паездкі ў Гомельскай вобласці, паведамляе БелТА.

Лукашэнка пацікавіўся тым, што ўжо зроблена да гэтага часу і падкрэсліў, што яго цікавіць вынік, выручка, а для гэтага павінны быць добра наладжаныя вытворчасць і рэалізацыя. Ён закрануў таксама сітуацыю з наладжваннем вытворчасці мармуровага мяса. Як далажыў віцэ-прэм'ер Міхаіл Русы, гэтую тэхналогію асвоілі восем камбінатаў. У гэты час робіцца ўсё магчымае, каб паменшыць выдаткі на яго вытворчасць. Сёння максімальна выкарыстоўваюцца магчымасці свабоднага выпасу жывёлы, аднак праз умовы надвор'я практычна паўгода жывёлу неабходна трымаць у стойле.

Лукашэнка папярэдзіў чыноўнікаў, што ўсе абяцанні, якія яны давалі яму, павінны быць абавязкова выкананыя. «Хопіць ужо абяцаць. Мяне цікавіць вынік. Паабяцаў - рабі. Я ж не буду гойсаць ва ўсёй краіне і за вас тут працаваць», - сказаў ён.

У гэтай сувязі Лукашэнка нагадаў аб даручэнні паводле будаўніцтва і рэканструкцыі ў краіне 1200 ферм. Як было даложана дыктатару, у гэтым годзе будзе канчаткова здадзеная 1 тыс ферм, не выконваюць даручэнне правадыра Віцебская, Берасцейская і Магілёўская вобласці. Лукашэнка жорстка папярэдзіў чыноўнікаў аб адказнасці за хлусню.

«Некаторыя думаюць: а, буду чакаць, пакуль яшчэ хтосьці грошы прынясе, укладзе ў рэканструкцыю ферм. А мне прывезлі ўчора фатаграфіі з некаторых старых ферм. Слухайце - гэта ж каменны век! Так што вы мне палацы гэтыя цяпер паказваеце, а што з тымі фермамі? Там жа таксама трэба прычыніцца», - сказаў ён.

«Не рэалізуеце праграму - адкажаце галавой», - падкрэсліў Лукашэнка, звяртаючыся да чальцоў урада. Ён таксама даручыў першаму намесніку старшыні КДК Леаніду Анфімаву і намесніку кіраўніка адміністрацыі ўрада Валерыю Іванову кантраляваць выкананне як праграмы агулам, так і кожнага аб'екта, што было намечана і што зроблена. «Каб я не слухаў казкі, і не хадзіў у музеях, якія мне падрыхтавалі да наведвання», - сказаў правадыр.